Фото: gov.kz
Тексеру кезінде күдікті келіншектің қалтасынан, жалға алған пәтерінің қуыс-қуысынан, жатын бөлмесінен, тіпті дәретханасынан түйілген синтетикалық есірткілер табылған. Ұнтақ түрінде қалташаларға салынған әлгі заттар сатып алушылар үшін арнаулы жерлерге жасырылатын «тығындылар».
Тәркіленген есірткілердің жалпы салмағы – 227,97 грамм. Бұл – «α-PvP» деп аталатын синтетикалық есірткі. Есірткі саудагерлерінің өздері оны «тұз» деп атайды. Сонымен бірге табылған сарғыш түстісі «мефедрон» деп аталады. Оның салмағы 57,57 грамм болған. Есірткіге қатысты айтылғанда бұлар өте үлкен көлем болып есептеледі.
Күдіктінің үйінен есірткіні қалташаларға салу үшін өлшейтін арнаулы электронды таразы, түйіншектейтін материалдар да табылды. «Күдікті әйелдің өзі есірткіге тәуелді. Ол бұрын да есірткі сақтағаны үшін сотталып, бас еркінен айырылған. Алайда түрмеден шыққаннан бері үш ай бойы қайтадан есірткі қолдану мен тарату жолына түскен. Енді ол Қылмыстық кодекстің 297-бабының 3-тармағымен есірткіні үлкен көлемде таратқаны үшін кемінде 10 жылға бас еркінен айырылады», дейді ЕҚКБ басшысы, подполковник Руслан Сапаров.
Қалташаларға салынып, түйіншектелген есірткіні қаланың түрлі қуысына күдік келтірмейтін әйелдер мен жасөспірім балалар таратады. Олар сатып алушының ақшасын алғаннан кейін шартты сөздермен келісіп, «тығынды» жасырылатын жерді телефонмен айтады.
Петропавл қаласының «Жұмысшы» кентінде «Toyota RAV4» көлігімен жүріп, есірткі салынған түйіншектерді арнаулы жерлерге жасырып жүрген 33 және 36 жастағы екі әйел де ұсталды.
33 жастағы әйелдің күйеуі мұндай заңсыз, оңай жолмен ақша табатын «шаруамен» айналысқаны үшін 2022 жылы сотталып, қазір жазасын өтеп жатыр екен. Әйелі соның қылмысын жалғастырып жүрген болып шықты. Көліктің ішінде отырған 36 жастағы екінші әйел де есірткіге тәуелді жандардың бірі екен. Олардың үйлерін тінту барысында үлкен көлемдегі, яғни 700 граммдай ақ ұнтақ табылды. Бұл да «тұз» деген атаумен белгілі «α-PvP» синтетикалық есірткісі. Екі әйелдің де осындай қылмыспен айналысып жүргендеріне төрт айдай болғаны да анықталып отыр.
17 жасар жасөспірім де есірткі түйіншектерін таратумен ақша тауып жүрген. Оны ұстаған кезде түйіншектер тұратын үйінен табылмай, әжесінің үйіне жасырынғаны белгілі болды. Үйінен 10 түйіншекке бөлініп, сатуға дайындалған синтетикалық есірткі шыға келгенде қария шошып, талып қала жаздаған. Әженің үйіндегі есірткінің жалпы көлемі 191 грамм болған
Жасөспірімнің де таратып жүргені – «тұз» деп аталатын жасанды есірткі. Кейінгі кезде қалада синтетикалық есірткіні тарату деректері көбейіп кеткені байқалады. Ұсталған кезде 18 жасқа толмағанымен бұл жасөспірім де сотталады. «Ұсталғанға дейін ол қашықтан есірткі таратумен айналысатын интернет-дүкендердің бірінде 3 айға жуық жұмыс істеп үлгерген. Тәжірибе көрсеткендей, есірткі таратушылардың барлығы осынша мерзімге ғана сайрандай алады, одан әрі бәрібір қамауға алынып, сотталады», дейді Руслан Сапаров.
Былтыр да облыста есірткі таратқаны үшін кәмелеттік жасқа толмаған 2 жасөспірімге сот үкімі шыққан болатын.
Солтүстік Қазақстан облысы
