Күні бүгінге дейін су басқан өңірлерге достық үйлерінен 700 млн теңгеден астам қаражатқа көмек жіберіліпті. Ол үшін 12 мыңға жуық волонтер қызмет көрсетіп жатыр.
– Қазақстан халқы Ассамблеясынан «Жүректен – жүрекке!» акциясының аясында қазіргі кезде 1 100 тонна гуманитарлық көмек жіберілді. Сомасы 750 млн-нан асты. Тек гуманитарлық көмек емес, өз техникасы, экскаваторы бар кәсіпкерлер көмек беріп жатыр. Су басқан өңірлерде күнделікті 1 000-2 000 адамға – төтенше жағдай қызметкерлері, волонтерлерге ыстық тамақ береміз, – деді Қазақстан халқы Ассамблеясының мүшесі, «Дустлик» өзбек бірлестігі төрағасының орынбасары Хасан Шәріпов.
Қазір елордада 9 гуманитарлық көмек қабылдау пункті жұмыс істеп тұр. Онда 30-ға жуық еріктілер ұйымы бар. Күн сайын 200-ден астам ерікті қажетті заттарды сұрыптайды. Айта кетерлігі, еріктілер қаржылық көмекті қабылдамайды. Тек қажетті заттардың тізімін жасақтап, әкелуге ниетті жандарға ұсынады.
«Жүректен – жүрекке!» акциясы барысында Астанадан Ақмола, Қарағанды және Солтүстік Қазақстан облыстарына гуманитарлық көмек жөнелтілді. Сондай-ақ ҚХА аясында республикалық және өңірлік штабтар құрылған. Волонтерлік орталықтар да ұйымдастырылды. Қоғам жанашырлары апатты аудандарда, ауылды мекендерде халыққа көмектесіп, дәрі-дәрмектерін алып барып, қиын-қыстау жағдайдағы ағайынның алғысын алып жүр.
