Суретті түсірген Ерлан ОМАР, «ЕQ»
Өтпелі кезеңде зауыт бірқатар қиыншылықты басынан кешірсе де, жоғары білікті мамандарды, өндірістік инфрақұрылымды, өздері шығаратын өнімнің негізін сақтап қалды. Қазір заман талабына сай ірі инвестициялық жобаларды және қызметтің жаңа бағыттарын тиянақты игеріп отыр. Өткен шаруаны талдай кететін болсақ, 2005 жылы «Krauss Maffei» неміс құрылғысын өндірісте пайдалану арқылы диаметрі 10 мм-ден 250 мм-ге дейінгі полиэтилен құбырларды игеруге арналған инвестициялық жобаны қолға алған болатын.
Осы жобаны игеру түптеп келгенде кәсіпорынға табыс әкеліп қана қойған жоқ, елді мекендерді таза сумен қамтуға айта қаларлықтай септігін тигізді. Құбыр мықты әрі ұзақ уақытқа шыдайтын бұйым болып шықты. Диаметрі 110-нан 1 000 мм-ге дейінгі полиэтилен құбырларын өндіру әлі де жалғасып жатыр. Зауыт басшыларының айтуынша, сапалы құбырға тапсырыс та жиі түсетін көрінеді. Кәсіпорын жылына мың тоннаға дейін газ саласында пайдаланылатын құрылғылар құю инвестициялық жобасын жүзеге асырды.
– Тапсырма бұрынғы Индустрия және жаңа технологиялар министрлігінің шешімі бойынша өнеркәсіптің өңірлік картасына енгізілген халықаралық жоба болатын, – дейді зауыт басшысы Қайрат Қалманбаев, – Кейін кәсіпорында жеке қорғаныс құралдарын дайындау цехы ашылды. Еліміздің күштік құрылымдары үшін оқ өткізбейтін жилеттер, соққыдан сақтап қалатын берік, мықты қалқандар шығара бастадық. Үнемі ізденіс үстіндегі ұжым 2017 жылдан бастап автомобиль крандарын құрастыру цехын іске қосты. Шарапатты шаруа мұнымен де шектеліп қалған жоқ. Электр қуатымен жүретін мүгедектер арбасын дайындау да жағымды жаңалықтың бірі болды. Әншейін арба ғана емес, қарға адым жер мұң болған қаншама адамның алғысын алатын ілкімді іс.
Кәсіпорын байланыс желісінің бөлшектерін, әрқилы медициналық жабдықтар, өрт сөндіру құралдарын да шығарады. Осыншама шаруаны 483 адамнан құралған ұжым атқарып жатыр. Шынтуайтында, акционерлік қоғам еліміздегі машина жасау саласының үздіктерінің бірі екендігін де айта кетуіміз керек. Кәсіпорынды алға сүйреп келе жатқан да ұйымшыл, он саусағынан өнер тамған осы ұжым. Ұжым мүшелері 2023-2025 жылдарға арналған ұжымдық шарт бойынша жұмыс істейді. Бір айта кетерлігі, еңбекті қорғауға тиісті көңіл бөлініп отыр. Әр жыл сайын кәсіпорын қызметкерлерін медициналық сақтандыруға кәдімгідей талап қойылады. Қызметкерлер толықтай медициналық тексеруден өткізіледі. Ең бастысы, денсаулыққа зиянды еңбек жағдайында жұмыс істейтіндерге толымды өтемақы төленеді. Жұмысшыларға денсаулықтарына келер зиянды сәл де болса азайту үшін сүт, сабын беріледі. Барлық өндірістік учаскеде алғашқы көмек көрсету үшін қажетті медициналық қобдишалар қойылған. Толымды жабдықталған денсаулық сақтау пункті жұмыс істейді.
Ұжымдық шартқа сәйкес еңбек жағдайын жақсартуға, жұмысшылардың денсаулығын қорғауға, жалақыны ұлғайтуға, еңбекті қорғау жүйесін жаңғыртуға жеңілдіктер мен өтемақылардың барлық түрін таңдауға, жалақыны индекстеуге, жұмысшыларының материалдық жағдайын жақсартуға бағытталған басқа да іс-шаралар қолға алынып отыр. Нәрестелі болған аналарға материалдық көмек көрсетіледі. Бала күтіміне байланысты демалыста жүргендерге ең төменгі жалақы төленіп тұрады. Ұжым мүшелеріне сауықтыру орындарына жолдама беріледі. Жолдама құнының 80 пайызын жұмыс беруші төлейді.
– Кәсіпорын жалпы жұмысшылардың жағдайын ойлап көмек көрсету мәселесіне келгенде тәп-тәуір жұмыс істеп отыр, – дейді №6 цехтың шебері Мейрам Тәшенов. – Еңбек демалысына шыққан кезде екі айлық еңбекақы мөлшерінде емделу үшін жәрдемақы беріледі. Көпбалалы отбасылар мен мүмкіндігі шектеулі балаларды тәрбиелеп отырғандарға материалдық көмек көрсетіледі. Әлеуметтік жағынан аз қамтамасыз етілген отбасылардың оқушы балаларына әр жыл сайын оқу жылы қарсаңында керек-жарақтарын сатып әпереді. Осының барлығы қарапайым еңбек адамдарына көрсетіліп отырған қамқорлық. Бәлкім, осындай жанашырлықтың барынан жастар құлағдар болғандықтан шығар, біздің ұжымда еңбек етуге тілек білдірушілер аз емес.
Шебердің айтуына қарағанда, кәсіпорында өзіндік еңбек дәстүрі қалыптасқан. Жұмысқа орналасқан жастарды бауырына тартып, еңбекке баулу, үйрету үрдісі жап-жақсы. Сайып келгенде, кәсіби шеберлердің өсуін үздіксіз қамтамасыз ету арқылы кәсіпорын қызметінің тиімділігін арттыруға мейлінше мән беріліп отыр. Жұмысшылардың жүктелген міндетті тыңғылықты орындауы да қадағаланады. Қадағаланып қана қоймай, кәсіпорында біліктілікті жетілдіру жақсы қойылған. Жыл сайын оқыту жоспары түзіледі. Жоспарға сәйкес жұмысшылар біліктілікті жетілдіру курсынан өтеді. Тұтас ұжымның шеберлігі арта түседі. Кадрмен жұмыс істеу жыл өткен сайын жақсарып, ішкі кадр резервінің тізімі бекітілген. Жаңадан қабылданған қызметкерді оқытып үйрете отырып, ықтимал қателіктердің саны мейлінше азая түседі.
Зауытта жұмысшы мамандығын қалаған жастарды еңбекке тарту үшін оқушылардың жұмыс кәсібін оқыту оң жолға қойылған. Белгілі бір мамандықтарды игеру үшін тәлімгерлер тағайындалады.
Сүттей ұйыған ұжымда бекем бірлік бар. Ал бірлігі бар жердің тірлігі де өміршең болмақ.
Көкшетау
