ТҮРКСОЙ халықаралық ұйымының бас хатшысы Сұлтан Раевтың қолдауымен өткен ауқымды іс-шара конференциядан бастау алды. Конференция барысында Қазақстанның Түркиядағы елшісі Еркебұлан Оңалбекұлы екі елдің мәдени қарым-қатынасын дамыту деңгейі артқанын атап айтты. Сондай-ақ Қазақстан Жазушылар одағының төрағасы Мереке Құлкенов әдеби мұраны бауырлас мемлекеттерде дәріптеудің маңызына тоқталды.
Жиында сөз алған Алматы облысы әкімінің бірінші орынбасары Нұрлан Әбдірахым ұйымдастырушыларға алғыс айтып, өңір басшысы Марат Елеусізұлының жылы лебізін жеткізді.
«Екі елдің арасында мәдени ынтымақтастықты дамыту мақсатында ТҮРКСОЙ халықара-лық ұйымымен бірлескен жұмыс жоспары жасалған. Соның аясында қазақ әдебиетінің классигі Бердібек Соқпақбаевтың 100 жылдық мерейтойы халықаралық деңгейде аталуда. Аталған ұйымның қолдауымен маңызды халықаралық жоба қолға алынып отыр. Ол – Бердібек Соқпақбаевтың «Өлгендер қайтып келмейді» романының жазылғанына 40 жыл толуына байланысты, тамаша туынды түрік тіліне аударылды. Осы іспеттес игі іс-шаралардың басынан табылған әрбір азаматқа алғыс білдіремін», деді облыс әкімінің бірінші орынбасары Нұрлан Ерғалиұлы.
Мерейтой аясында халқымыздың руханиятына өшпес мұра қалдырған жазушының жеке заттары, кітаптары мен экспонаттар қойылған көшпелі көрме ұйымдастырылды. Көрмеде Кеген аудандық тарихи-өлкетану музейінің негізгі қорында сақталған Бердібек Соқпақбаевтың қолшатыры, сағаты, отбасылық суреттері және тағы басқа да заттары көпшілік назарына ұсынылды.
Түркияның төрінде өткен мәдени-әдеби іс-шарада Мемлекеттік сыйлықтың лауреаты, дәулескер күйші-композитор Секен Тұрысбектің жетекшілігімен «Ақжауын» камералық оркестрі өнер көрсетті. Концертте қазақ композиторларының туындыларымен қатар, түрік елінің әуезді әндері орындалды.
Түрік жұрты қарымды қаламгердің шығармаларымен танысып, күй тыңдап, қазақтың музыка өнерін тамашалады.
Алматы облысы
