Денешынықтыру кабинеті, ән және ойын терапиялық бөлмелері заманауи үлгіде жасақталып, арнайы мектеп кабинеттері ұлттық нақышта безендірілген. Бір бөлме аспан ғаламшарларымен көркемделіп, телескоп аппараты қойылған, яғни балалардың қиялына ерік беретін мүмкіндік жасалған. Облыстық балаларды оңалту орталығы 3 жастан бастап кәмелетке толмаған мүмкіндігі шектеулі балаларға медициналық көмегін ұсынады. Мұндағы 175 төсек-орынның 85-і неврологиялық, 90-ы ортопедиялық сырқаттарға арналған. Былтыр мұнда 2 800 бала оңалту ем-шараларын қабылдаған. Орталықта 177 адам тұрақты жұмыс істейді.
«Біз садақаны сауапты іске жұмсап, орталық қызметін жақсарта түсу мақсатындағы бастаманы біраздан бері ойлап жүргенбіз. Ем алуға келген балаларды барынша қызықтырып, өмір сүруге құлшынысын арттыруды қаладық. Түрлі кабинеттер ашып, баланың зейінін көтеруге мүмкіндік сыйладық деп ойлаймын. Біздің орталыққа келген балалар 18 күн ішінде білім алып, жан-жақты дамиды деген сенімдемін. Осы бастамамды қолдап, қолұшын созған кәсіпкерлерге, ұжымдағы барлық қызметкерге шексіз ризашылығымды білдіремін. Сырттан адам шақырмай, барлық істі жұмыла атқардық. Ойымдағыдан да керемет дүниелер шықты», дейді оңалту орталығының басшысы Нұрхан Нарымбетова.
Орталықта балалардың медициналық ем-шаралармен қоса үздіксіз білім алуын қамтамасыз ету мақсатында бастауыш, негізгі және жалпы орта білім беру көлемінде математика, қазақ тілі мен әдебиеті, орыс тілі, Қазақстан және дүние жүзі тарихы, жаратылыстану, география пәндері базалық тәртіпте оқытылады. Математика пәні Qalan.kz интерактивті онлайн порталы арқылы өткізіледі. Ерекше балалардың математикалық сауатын арттыру маңызды екенін ескеріп, аталған порталды бір жыл тегін пайдалану мүмкіндігін сыйлаған Qalan.kz-тің негізін қалаушы Асқар Болатқа орталық қызметкерлері дән риза. Іскер басшы Нұрхан Мәдәліқызының осындай балалар үшін жасаған игілікті де сауапты ісі әріптестеріне үлгі болып отыр.
«Ұжымдағы мейіргерлер, кіші қызметкерлер бірігіп, бірі қабырғаға сурет салып, бірі ою ойып, тұсқағаз жабыстырып, бірі арнайы аппарат сатып алып беріп, бірі қолданыстан тыс қалған арбасын әкеліп үлкен ұйымшылдық танытқан. Арнайы бөлме ыңғайластырып, телефонға телмірген балаларға пайдалы дүниені үйретудің өзі – үлкен қуаныш. Ауыз толтырып айтуға боларлық бұл бастама жалғасын табады деп ойлаймын», дейді Денсаулық сақтау басқармасының облыс бойынша штаттан тыс балалар реабилитологі Мариям Парманова.
Айта кетелік, Түркістан облысында мүгедектігі бар 11 мыңға жуық бала есепте тұрады. Соның 30 пайызы – жүйке жүйесі ауруларына шалдыққан ерекше балалар. Оларға өңірде 4 оңалту, 3 қамқорлық орталығы қызмет көрсетеді.
Түркістан облысы
