Павлодарда ағаштар бүршік жарды

Әдетте қаһарына мінетін қаңтар айы биыл Павлодар облысында жайма-шуақ ауа райымен ерекшеленді. Өңірде апта бойы 0-ден +1 градус аралығында жылы температура сақталып келді. Ал кеше Павлодарда сынап бағанасы +3 градусқа дейін көтерілді. Осылайша, күннің жылынуынан ағаштар мезгілсіз бүр жара бастаған. Синоптиктердің айтуынша, бұл оңтүс­тіктен жеткен циклонның әсері көрінеді. Осыған ұқсас жағдай Павлодар облысында он жыл бұрын тіркелген екен. Мамандар мұны уақытша құбылыс деп есептейді. Өйткені, кешке қарай ауа температурасы -12 градусқа дейін төмендейді деп күтілуде. Биологтар ағаштардың мезгілінен бұрын бүршік жаруына қуанудың қажеті жоқ екенін айтып отыр. «Ағаштың сағасынан бөлінетін судың көптігінен оны қоршап тұрған балауыздар еріп кетеді. Тамырына ылғал беретін топырақты қазір қар басып жатыр, сондықтан өсімдік еріп кеткен балауыз арқылы көп ылғал жоғалтады. Бұл ағаштарға қауіп төндіреді», – дейді мамандар. Айдар ӨРІСБАЕВ, «Егемен Қазақстан».