Акция аясында демалыс орындары мен қоршаулар жаңаланып, көл маңайы қоқыстан тазартылды. Жиналған қатты қалдықтар көлікке тиелді. Сондай-ақ көл жағасындағы көлік тұрағына көшеттер отырғызылды.
Есік көлі Іле Алатауының Есік шатқалында теңіз деңгейінен 1 800 метр биіктікте, Алматыдан шығысқа қарай 40 шақырым жерде орналасқан. 1963 жылғы 7 шілдеде болған жойқын тасқыннан кейін бұл жерде селден қорғайтын бөгеттер салынған. Содан бастап Есік көлі демалыс аймағы емес, селден қорғайтын бөгет саналады. Көздің қарашығындай мөлдіреп жатқан көлді тамашалауға алыс-жақыннан ағылатындар аз емес. Сол себепті туристердің қауіпсіздігі мен жайлылығын қамтамасыз ету – басты міндет. Акцияға арнайы қатысқан облыс әкімі Марат Сұлтанғазиев сапар барысында өңірдің туристік әлеуетін арттыратын әрі экологиялық жағдайды жақсартуға мүмкіндік беретін инвестициялық жобалармен де танысты.
Жалпы, Еңбекшіқазақ ауданында тау туризмін дамытуға мүмкіндік мол. Өңір басшысымен кездескен кәсіпкерлер Есік көлінің аумағында биодәретханаларды, шағын дәмханаларды, телефон мен интернет желілерін іске қосатын жаңа жобаларды таныстырды. Аталған жобалардың Іле Алатау ұлттық табиғи паркінің экологиясына зиян тигізбейтіні де тілге тиек болды.
Облыс басшысы «Мөлдір бұлақ» апталығына қатысушыларды құттықтай келе, көрікті табиғатымен тамсантып қана қоймай, 100 мыңнан аса адамды ауызсумен қамтып отырған Есік көлінің маңызын атап өтті.
– «Мөлдір бұлақ» акциясын осы көлден бастағанды жөн көрдік. Өйткені оның маңызы зор. Бұл, біріншіден, ауызсу болса, екінші жағынан, суармалы жерлерді қамтамасыз етеді. Үшіншіден, біраз каскадты ГЭС-теріміз бар. Есік көлінің бөгеті жеке кәсіпкерлерде сенімгерлік басқаруда болған, былтыр сот арқылы мұны мемлекет меншігіне қайтардық. Енді көлдің жағдайын көріп тұрғандарыңыздай, біраз жерін құм басып кеткен. Осы апталықтың аясында облыстағы өзен-көлдер мен каналдарды, суару стансаларының айналасын қоқыстан тазартуды жоспарлап отырмыз, – деді М.Сұлтанғазиев.
«Мөлдір бұлақ» акциясы – өңірдің су ресурсына қамқорлық. Алматы облысында 310 гидротехникалық құрылыс болса, оның ішінде 72 суқоймасы, 112 тоған, 13 бөгет пен дамбы, 14 ауызсу торабы және 99 магистралды каналдар бар. Дәл осы су жолдары егіс алқаптары мен қалаларға нәр беріп, өңірдің тыныс-тіршілігін қамтамасыз етеді. Алғашқы күні облыстың барлық ауданында марафондар, жарыстар және флешмоб форматында 50-ден аса сенбілік өтті. Акцияға қатысушылар Ұзын-Қарғалы, Талғар, Қарқара, Шарын, Қаскелең, Үлкен Алматы сынды өзендер арнасының жағалауларын тазартты.
– Президенттің бастамасымен жүргізіліп жатқан «Мөлдір бұлақ» акциясына бір кісідей қатысуды жөн көрдік. Бұл қуана құптарлық жақсы бастама болды. Өйткені үйімізге келген туыс-туған, дос-жаран көлді көруге асығады. Ауданымызда орналасқан Есік көлі таза, әдемі болып жарқырап тұрғаны біз үшін де маңызды. Сондықтан мұндай істен ауыл азаматтары қалыс қалмады, – дейді Түрген ауылының тұрғыны Есендос Асубай.
«Таза Қазақстан» акциясы басталғалы Алматы облысында бірқатар ауқымды жұмыс атқарылды. Облыстың 500 мыңнан аса тұрғыны аумақтар мен аулаларды тазалауға, тарихи, мәдени ескерткіштерді абаттандыруға, ағаш көшеттерін отырғызуға, оларды әктеуге қатысты. Ардагерлер мен қарттар үйінің аулаларын ретке келтіруге көмектесу үшін эко бригадалар ұйымдастырылды.
Алматы облысы
