Фото: sport_basqarmasy_astana
«Қазақстан чемпионаты жылына бір мәрте ұйымдастырылады. Биыл 8 облыстан спортшылар қатысып жатыр. Былтыр 5 облыстың спортшылары келген, биыл қатысушылар қатары артты. Турнирде ұзақ бағдарлама бойынша жас ерекшеліктеріне қарай 260 адам жүлдеге таласып жатыр. Қысқа бағдарлама 1,5 минутты қамтыса, ұзақ бағдарлама 3,5 минутқа дейін жалғасады. Турнирдің нәтижесінде күзде Гонконгте өтетін Азия чемпионатына баратын үздіктер іріктеледі», деді жарыстың бас төрешісі Заира Жақыпова.
Айта кетсек, эстетикалық гимнастикадан Қазақстан құрамасы 2019 жылдан бері әлем чемпионатына тұрақты түрде қатысып келеді. 2022 жылы Аустриядағы жаһандық додада командалық сайыс бойынша қола жүлдеге ие болса, 2023 жылы Алматы қаласында 16 мемлекеттің қатысуымен өткен әлемдік бәсекеде жасөспірімдер санатында Астана қаласының «Самұрық» командасы бірінші рет қола жүлдегер атанған еді.
Эстетикалық гимнастикаға қатысатындар көркем гимнастиканың элементтерін ғана емес, спорттық гимнастика, би жағынан да шеберліктерін шыңдай алады.
