Талғар аудандық Мәдениет үйінде аймақтық техникалық және кәсіптік білім беретін оқу орындарының студенттері арасында өткен бұл байқауға өңірдегі 23 колледжден 84 білім алушы қатысып, 12 аталым бойынша бақ сынасты.
«Бұл жарыс кәсіптік білім алушы студенттердің кәсіби шеберлігі мен шығармашылық ізденістерін жан-жақты көрсетті. «WorldSkills Qonaev – 2024» – жұмысшы мамандықтарының олимпиадасы деу орынды. Өйткені ол, студенттерге алған білімін кәдеге жаратумен қатар, шеберліктерін шыңдауға, қателіктерін түзеуге, кәсібилігін арттыруға бағыт-бағдар береді. Байқауға қатысушы студенттердің барлығы талантты, өз кәсібін қадірлейтіні көрініп тұр. Осы жарыста топ жарған жеңімпаздар білімдері мен кәсіби шеберліктерін республикалық чемпионатта дәлелдейтін болады. Өздеріңізге белгілі, ұлттық чемпионаттың бір тапсырмасы ағылшын тілінде ұсынылады, сол себепті жеңімпаз студенттеріміз ағылшын тілін үйренумен қатар, практикалық дайындығын кәсіпорын базасында жетілдірудің мүмкіндігін қарастыру маңызды», деді облыстық білім басқармасының басшысы С. Беспаева.
Үш күндік чемпионатта «Аспаз ісі» бойынша Алматы облысының қызмет көрсету және тамақтандыру саласындағы инновациялық технологиялар колледжінің студенті Нұрсұлтан Толыбек жеңімпаз атанса, «Шаштараз өнері» мен «Сән технологиясы» аталымдарында да осы колледждің студенттері Әнел Иманқожа мен Альмира Каримова топ жарды. «Графикалық дизайн» бойынша Алматы экономикалық колледжінің студенті Айсұлтан Бердешов 1-орын иегері атанса, «Веб технологиялар» және «Электромонтаждау жұмыстары» аталымында Талғар политехникалық колледжінің студенттері Таиржан Ахметов пен Анатолий Кончаков жеңімпаздар қатарынан көрінді.
Өз мамандықтарын қорғау бойынша біліктілік танытқан білім мекемелері барынша белсенді болды. «Төменгі сыныптарды оқыту» бойынша Есік гуманитарлық-экономикалық колледжінің студенті София Вьюн үздік атанса, «Шанақ жұмыстары» бойынша Қаракемер кәсіптік колледжінде білім алушы Қуандық Оразымбетов ортасынан озды. Сондай-ақ «Жеңіл автомобильдерді жөндеу және қызмет көрсету» сайысында Талғар агробизнес және менеджмент колледжінің студенті Әділет Әдебиетұлы жоғары балл жинап, жеңімпаз атанды.
«Дәнекерлеу технологиясы» бойынша Кәсіптік оқудағы көпсалалы колледжінде білім алатын Ілияс Жәрімбетов 1-орынды иеленсе, «Мектепке дейінгі тәрбие және дайындық» аталымында Есік гуманитарлық-экономикалық колледжінің түлегі Еңлік Әлнұр, ал «Желілік және жүйелік әкімшілендіру» бойынша Талғар политехникалық колледжінің студенті Сабыржан Әміров үздіктер қатарынан көрінді.
Жеңімпаздарды облыстық мәслихат депутаты Серікхан Әділханов құттықтап, студенттердің кәсіптік шеберлігі жылдан жылға арта түскендігін атап айтты.
«Мен «ELECTUDE» бағдарламасы бойынша «Приора» автокөлігінің қозғалтқышын және ВАЗ-2107 көлігінің беріліс қорапшасын бұзып-жинау бойынша бағымды сынадым. Қозғалтқышты бұзып-жинауға 3 сағат, беріліс қорапшасына 1,5 сағат уақыт берілді. Оған қоса, айналаңды таза ұстау да назарға алынды. Сондай-ақ ақауды анықтауда да тапқырлық танытуым керек болды. Осының бәрі ескеріле келіп, 100-ден 90,8 балл жинап, жеңімпаз атандым. Менің бұл мамандыққа келуіме әкемнің 40 жылдан бері көлік жүргізетіні және ағамның да машина жасаумен айналысатыны айрықша әсер етті. Алдағы республикалық чемпионатта жеңіс тұғырынан көрінуге күш саламын», деген «Жеңіл автомобильдерді жөндеу және қызмет көрсету» сайысының жеңімпазы Әділет Әдебиетұлы келешекте Қазақ көлік қатынастары университетіне оқуға түсіп, жоғары білім алуды, мықты маман болуды армандайды.
Алматы облысы
