24 сағат

*Қызметкерлері баудай түсірілген француздық сати­ралық журналдың жаңа нөмірі бүгін Мұхаммед пайғамбарға арналған кезекті карикатура суретпен қайта шығатын болды. Тиражы – 3 миллион дана. Бұған дейінгісі 60 мың ғана таралыммен шығып келген болатын. Сөйтіп, журнал шығарушылар қасіреттің үстінен де пайда көргісі келетіндей. * Америкалық конгресмен Рэнди Уэбер АҚШ президенті Барак Обаманың Парижге терроризмге қарсы маршқа барудан бас тартуына «түсініктеме берді». Өкілдер палатасының өкілі өзінің пікірін білдіре келе, Обаманы Гитлермен салыстырды. «Тіпті, Адольф Гитлер үшін де Парижге бару (дұрыс емес себеппен болса да) маңызды болған еді», деп атап өтті республикашыл. * Біріккен Араб Әмір­ліктерінің энергетика ми­нистрі Фарадж әл-Мазруи мұ­най экспорттаушылар ұйымы ел­дерінің (ОПЕК) мұнай баға­сын қорғауға қабілетсіз екенін мойындады. Оның сөзіне қара­ғанда, мұнай бағасын бірден көтеру еш мүмкін емес, бірінші кезекте оны қалыпты деңгейде ұстап тұруға күш-жігер жұм­салуы тиіс. * АҚШ-тың Нью-Йорк қала­сында тұратын бүгінгі зейнеткер, бұрынғы мектеп директоры Гарольд Даймонд лотерея­дан 326 миллион доллар ұтып алды. Сексен жастағы «ақсақал» билетті май құю стансасынан кездейсоқ, яғни зайыбымен бірге жаңбырдан қорғану үшін кірген кезде 10 долларға сатып алыпты. Молынан салынатын салықтан қалған 130 миллион доллар қарияға қалай жұмсаса да жететіні анық. * Қытай жақын уақытта қа­рулануға жаңғыртылған J-10В жойғыш ұшағын қабыл­дайтын болады. Жаңа үлгіде­гі ұшақ саны – 14. Алайда, Аспа­н­асты елінің әскери-әуе күш­тері J-10В жойғыш ұшақ­тарының алғашқы полкін қашан жасақтайтыны белгісіз. Ал жаңғыртылған ұшақтар конвейерден 2013 жылдың желтоқсанында шыққан екен. * Сүңгуірлер өткен жылдың желтоқсан айының соңында Яван теңізі акваториясында апатқа ұшыраған AirAsia әуе кемесінің екінші «қара жәшігін» де жер бетіне алып шықты. Енді «қара жәшіктер» екі апта бойы мұқият тексерілетін болады. Еске сала кетсек, апатқа ұшыраған жолаушылар ұшағының бортында 162 адам болған еді.     * Түрікменстанда бір жыл ішін­де президент Гурбангулы Бердымұхамедовтің порт­реті шамамен екі есе қымбат­та­ған. Мұны «Хроника Туркме­нистана» хабарлады. Дерек көзі атап көрсеткендей, бір жыл бұрын портреттерді 16 манатқа сатып алу мүмкін болса, енді олардың әрқайсысы 33 манат (шамамен 10 доллар) тұ­рады екен. Басталған жылда жер­гілікті мектеп директорлары президенттің жаңа портреттерін сатып алуға міндеттеліпті.    * Ресейдің Калининград қаласында ескі Берлин көпірі опырылып түсіп, апат салдарынан өткелді бөлшектеп бұзып жатқан 4 жұмысшы қаза тапса, екеуі жараланған. Поли­ция қызметкерлері нысан­дағы жұмыстарды қандай құры­лыс компаниясының адамдары жүр­гіз­генін анықтау үстін­де. Аталған көпір, тозығы жеткен­діктен соңғы жылдары пай­дала­нылмайды екен. Сон­дық­тан өткен жылдың қара­ша­­сынан бастап бөлшектеле бас­таған. Ол 1938 жылы салыныпты. Ақпарат агенттіктерінің материалдары негізінде әзірленді.