Қоғам • 22 Мамыр, 2024

Жезқазған ақындары жырлайды

35 рет
көрсетілді
2 мин
оқу үшін

Ұлытау облысында «Кеңгір керімсалы» атты республикалық поэзия фестивалі өтті. Жас ақындардың қаламын ұштап, талабын арттыру мақсатында жасалған өлең мерекесі облыс құрылғалы бірінші рет ұйымдастырылды. Іс-шараның ашылу салтанаты орталықтағы Абай ескерткішінің алдында өтті. Жиылған жұртшылық бас ақынның рухына тағзым етіп, гүл шоқтарын қойды. Фестивальға құрметті қонақ ретінде «Отан» орденінің иегері Жүрсін Ерман, жыршы, профессор Алмас Алматов, Абай атындағы мемлекеттік сыйлықтың лауреаты Ғалым Жайлыбай, Қазақстан Жазушылар одағы басқарма төрағасының орынбасары Бауыржан Жақып арнайы шақырылды.

Жезқазған ақындары жырлайды

Ашылу рәсімінен кейін орта­лықтандырыл­ған балалар мен жасөспірімдер кітап­ханасында «Жаңа кезең. Жас қаламгер» дөңгелек үстелі өтті. Онда қонақтар мен жергілікті қаламгерлер сөз сөйлеп, әдебиет­тің дамуы үдерісі хақында пікір алмасты. «Кеңгір керім­салы» фестивалі кемеріне толған Кеңгірдің суы секілді жылдан-жылға айдынданып, айбындана беретін баянды мерекедей көрініп отыр. Халықаралық деңгейге шығатынына да кәміл сенемін. Бұл – поэзия салтанаты Ұлытау өңірінің рухани өміріндегі үлкен жаңалық», деді Ғ.Жайлыбай. Іс-шара С.Қожамқұлов атындағы музы­калық драма театрын­да «Кең­гірдің қоңыр кешінде» атты поэ­зия кешімен жалғасын тапты. Бауыржан Жақып өлең оқып, басқарма төрағасының құт­тықтауын жеткізді. «Жас ақындардың алдында үлкен жол күтіп тұр. Сол қасиетті сапар киелі Ұлытау даласынан басталып, Қазақстан аспанына жыр жұпарын аңқытса, ұлт руханиятына үлкен олжа салынды деген сөз», деді ол.

Жезқазғандық төрт қалам­гер – Мұқаш Сейіт­қазинов, Ернұр Сейдахмет, Сара Смағұл, Төлеш Асанға мүшелік билет пен төсбелгі тапсыру рәсімі өтті. Сонымен қатар Ұлытау облысы жас ақындарының «Кеңгір керімсалы» антология­сы және жезқазғандық Жанат Әбдіғожиннің «Арнадым саған» кітабы оқырманға жол тартты.

Фестиваль жергілікті ақын Мұқағали Сейіт­қа­зының «Маған сені жақсы көрген ұнайды» атты әдеби-сазды кешімен аяқталды.