Мемлекет басшысы бастап берген жалпы ұлттық экоакция аясындағы «Жасыл аймақ» күніне орай, Ұзынкөл ауданына қарасты Ершов аулының орталық саябағына 250 емен көшеті отырғызылды. Шалғай ауылда өткен экологиялық іс-шара жергілікті шаруашылықтың басшысы Сәбит Ағайдаровтың қаржылай қолдау көрсетуімен өткенін де айта кеткен жөн.
«Бізде ауыл тұрғындарының жағдайын жасап, халықтың өмір сүру сапасын арттыру, қолайлы жұмыспен қамтамасыз ету мәселесін шешіп беріп жатқан жергілікті шаруашылық басшылары, кәсіпкерлер бар. Мысалы, бүгінгі саябаққа көшет отырғызу акциясы негізінен «Ершов-2» ЖШС көмегімен атқарылып жатыр. Бұл саябақтың бүгінгідей абат кейіпке енуіне жоғарыда аталған серіктестік пен «Ержанов А.Ж.», «Надежда» шаруа қожалықтары, Ұзынкөл орман шаруашылығының жұмысшылары көп еңбек сіңірді. Сондай-ақ саябаққа үнемі күтім жасап, қоқыстан тазартып отыратын бюджеттік мекемелердің де еңбегі зор. Осының нәтижесінде кейінгі 7 жыл ішінде саябаққа төсемтас төселіп, түрлі демалыс алаңы, жүгіру жолағы, көзтартар газон пайда болды. Ал мұндағы балалар алаңқайын бюджеттің қаржысына салдық», дейді ауылдық округ әкімі Мария Гоян.
Ауыл әкімінің айтуынша, биыл Ершовта балаларға арналған тағы бір ойын алаңын, сондай-ақ коньки тебу кортын салу жоспарда тұр.
Республикалық экологиялық акцияға сәуірден бері белсенді атсалысып жатқан рудныйлықтар Тобыл өзенінің жағасында «Спорттық экожорық» деп аталатын тимбилдинг өткізді. Іс-шараға жастардың еңбек жасақтары, колледж студенттері, қалалық төтенше жағдай басқармасы мен жастар ресурстық орталығының өкілдері – барлығы ұзын-ырғасы 60-тан астам адам қатысты.
Тимбилдинг өзен жағасын қоқыстан, тұрмыстық қалдықтардан тазартудан басталды. Одан әрі қалалық төтенше жағдай басқармасының қызметкерлері түрлі макет пен арнайы құрал-жабдықтарды пайдалана отырып, көпшілікке суда жүзу, өрт қауіпсіздігін сақтау ережелерін түсіндіріп, тренинг ұйымдастырды. Сонымен қатар төтенше жағдайлар кезінде зардап шеккендерге алғашқы медициналық көмек көрсетудің жөн-жосығын көрсетті. Ал Рудный әлеуметтік-гуманитарлық колледжінің студенттері көңілді музыкалық жаттығу, спорт жарыстары мен квест өткізді.
Экожорықтың соңында үздік командалар мен ең көп қоқыс жинаған топ марапатталды. «Спорттық экожорық – қала тұрғындарының экологиялық жауапкершілігін арттыруға, көпшіліктің табиғатқа жанашырлықпен қарауын қалыптастыруға бағытталған. Ал спорттық іс-шаралар, квест, тренингтер тазалық акциясына қатысқан топтарды өзара жақындастырып, көптеген осындай игі іске атсалысуға құлшындырады», дейді ұйымдастырушылар.
Рудныйдағы еңбекші жастар жасақтары маусымның үшінен бастап қаланы абаттандыру жұмысын атқарып жатыр. Қаланы қара күзге дейін таза ұстап тұруға бекінген бұл жасақтың құрамында 150 жас сарбаз, 15 командир еңбек етіп жүр.
Дәл осы күні шекара түбінде жатқан Қарабалық ауданының волонтерлері мен жастардың еңбек жасақтары бірлесіп, «Жастар таза Қазақстан үшін» деп аталатын флешмоб өткізді. Белсенді жастардың басын қосқан іс-шараға 50-ге жуық белсенді жас қатысты.
«Аталған іс-шараның басты мақсаты – суқоймаларының айналасындағы санитарлық тазалықты сақтау, жастардың қоғамдық белсенділігін арттыру, көпшіліктің табиғатқа жанашырлығын дамыту. Акция аясында Тоғызақ өзенінің бойындағы ұзындығы 4 шақырым болатын жағалау қоқыстан тазартылды. Сондай-ақ осы өзенде тұрған бөгеттің айналасы реттеліп, ауыл тұрғындары жиі барып демалатын жағажай қоқыстан тазартылды», дейді ауылдың белсенді тұрғыны Ирина Алтынникова.
Қостанай қаласында «Таза Қазақстан» республикалық акциясы аясында пайда болып, бүгінде дәстүрлі іс-шараның біріне айналған «Таза ойындар» жастар экологиялық акциясы өтті. Ойынға «Neco» экологиялық қоры мен Қостанай облысының жастар ресурстық орталығы мұрындық болды.
«Мұндай көңілді, жастарды еліктіретін іс-шараның басты мақсаты – экологиялық акцияларға үзбей қатысып жүрген жастар қатарын көбейту. Мәселен, бүгінгі акция балаларға өте қатты ұнады. Келешекте «Таза ойындар» кәдімгі спорт жарыстары сияқты қоғамға пайдасы мол дәстүрлі іс-шаралардың қатарына қосылады. Өйткені жастардың бұл ойынға деген ынтасы зор», дейді облыстық МРК басшысы Абай Дүйсеков.
«Таза ойындар» акциясына «Жасыл ел» жастар еңбек жасақтарының мүшелері, ЖРО өкілдері мен еріктілері, Жастар ассамблеясының жергілікті волонтерлері қатысты.
Сонымен қатар Арқалық қаласы мен Амангелді, Жангелдин, Сарыкөл, Денисов, Федоров аудандарында да тұрғындардың экологиялық мәдениетін арттыруға арналған түрлі мазмұндағы, әр сипаттағы іс-шаралар ұйымдастырылды. Мәселен, Арқалықта – «Таза Арқалық» флешмобы, Сарыкөлде – «Қоқыссыз Сарыкөл», Денисов ауданында спорт нысандарының айналасын абаттандыруға арналған іс-шара, Федоров ауданында «Ең таза балалар алаңы» акциясы өтті.
«Ауыл тұрғындары бірлесіп бір күн бойы балалардың ойын алаңдарын тазаладық. Алаңдағы ойын нысандарын жаңалап, бояп, сынған орындықтарды бүтіндедік, қоқыс жәшіктерін орнаттық. Балалар арасында экологиялық тақырыпта сайыстар мен викториналар ұйымдастырылып, ойын алаңдарында тазалық пен тәртіпті сақтаудың маңызды екені туралы әңгімелер өткізілді», дейді Федоров аудандық жастар ресурстық орталығының директоры Мұстафа Ахметчин.
Биыл өңірде елді мекендерді абаттандыруға 11 миллиард теңгеден астам қаржы бөлінген. 130 мыңнан астам көшет отырғызу жоспарланған. Бүгінге дейін соның 51,4 мыңнан астамы отырғызылды. Көшелер 90 пайызға жарықтандырылып, 108 ауылға 129 шақырым қоршау орнатылады.
Сәуір айынан бері үзілмей келе жатқан тазарту жұмыстарына ішінде мемлекеттік органдар мен жеке ұйымдар, шаруа қожалықтары, жастар, волонтерлік және үкіметтік емес ұйымдар, мәслихат депутаттары, ПИК, МИБ өкілдері бар – барлығы 249,6 мың адам қатысып, 106 рұқсат етілмеген қоқыс алаңы жойылды, 300-ге жуық саябақ абаттандырылып, 127,0 мың тонна қоқыс шығарылды.
Қостанай облысы
