Әскери кеңес: жыл қорытындысы

Алматы қаласында Қазақстан Республикасы Ұлттық қауіпсіздік комитеті Шекара қызметінің Әскери кеңесі болып өтті. Оған Ұлттық қауіпсіздік комитетінің төрағасы Нұртай Әбіқаев қатысты, деп хабарлады ҚР ҰҚК ШҚ-ның баспасөз қызметі. Әскери кеңес барысында «Семей» шекаралық жеке бақылау әскери бөліміне жауынгерлік ту тапсырылды. Әскери кеңеске төрағалық еткен Ұлттық қауіпсіздік комитеті төрағасының орынбасары – Шекара қызметі директорының міндетін уақытша атқарушы полковник Дархан Ділманов әскери кеңес мүшелерін күн тәртібімен таныстыра келе, былтырғы жылы қол жеткізілген негізгі табыстарға тоқталды. Әскери кеңес мүшелері 2014 жылғы әскери-жауынгерлік қыз­мет­тегі табыстар, материалдық-тех­ни­калық қамтамасыз етілу ба­ры­сы және әскери тәртіп мәсе­лесі­не кеңінен тоқталды. Атап айт­қан­да, былтырғы жылы шекарашы­лар қызметінде контрабанданы анықтау, есірткіні ұстау дерек­тері­нің жиілегендігі айтылды. Өткен жыл ішінде 24 мыңнан астам құқық бұзушылық анықталыпты. Жүк­терін контрабандалық жолмен өткізуге тырысқан 673 дерек тіркеліпті. Ал тәркіленген жүктер­дің салмағы 2 мың тоннаны құраса, 1,5 тоннаға жуығы есірткі заттары, оның 96,8 килосы «героин». Каспий теңізінде арнайы сауықтыру іс-шаралары өткізіліп, оның барысында 144 жүзу құрал­дары, 4 мың дана бекіре балығы, 1 мың дана бекіре тұқымдас ба­лықтар, 200 шақырымға жуық қар­мақты құралдар, 280 шақырым ау құралдары тәркіленген. Аталған заң бұзушылықтар бойынша 190 қылмыстық іс қозғалыпты, сол бойынша 10 394 азамат айыппұл жазасына кесілген. Жалпы салынған айыппұлдың сомасы 168 млн. 888 мың теңгені құрайды. Шекара қызметін қару-жарақ, техника құралдары және басқа да арнаулы құралдармен жабдықтау ісі жалғастырылды. Оның ішінде «Ан-74Т-200А» ұшағы, «Ми-171Ш» деп аталатын 2 бірдей көліктік әскери тікұшақ сатып алынған. 9 әуе кемесі заман талабына сай жөнделіп, жаңғыртылды. Осының нәтижесінде, түнгі көру құралдары арқылы түнгі барлау жұмыстарына шығуға мүмкіндік ашылды. Авиацияның тасымалдау қуаты да артты. Каспийдегі теңіз шекарасын күзету ісіне «Айбар» жо­ба­сы бойынша жасалған кеме пай­далануға берілгендігін ерекше атап өткен жөн. Шекарашылардың автопарк қызметі де айтарлықтай жаңартылды. 477 дана автомобиль мен инженерлік-жол техника­лары сатып алынды. Медици­на­лық қызмет көрсету ісін жақсар­ту мақсатында былтырғы жылы рентгенологиялық және стома­толо­гиялық кешендер алынды. – Өткен жыл геосаяси және әлемдік экономика саласында өзгерістерге толы болды. Жаңадан қауіп-қатер аймақтары пайда болды. Террористік және экстремистік ұйымдар тарапынан қауіп-қатер көбейді. Аталған қауіп-қатерлерге тойтарыс беру қажеттігі Мемлекет басшысы Нұрсұлтан Назарбаевтың «Нұрлы Жол – болашаққа бастар жол» атты Жолдауында нақты айтылған. Елбасының тапсырмасын орындау үшін барлық күш-жігерімізді біріктіруіміз керек. Шекара қызметі Ұлттық қауіпсіздік комитетінің құрамдас бөлігі болып табылады, сондықтан атқаратын міндеттері де ортақ, ол – еліміздің ұлттық қауіпсіздігін қамтамасыз ету. Осы міндетті орындау жолында барлықтарыңызға табыс тілеймін, – деп атап өтті өз сөзінде ҰҚК төрағасы Нұртай Әбіқаев. Кеңес барысында үздік шекара отрядтары, үздік заставалар және үздік шекарашылар анықталып, марапатталды.