Аймақтар • 02 Шілде, 2024

«Жайлы мектеп»: Алматы облысында 26 білім ошағы салынып жатыр

61 рет
көрсетілді
3 мин
оқу үшін

Мәжіліс депутаты, «AMANAT» партиясы фракциясының мүшесі Максим Рожин Алматы облысының Қарасай ауданына қарасты Қаскелең қаласында салынып жатқан 1500 орындық мектептің құрылысымен танысты. Білім ошағының құрылысы «Жайлы мектеп» ұлттық жобасы аясында іске асырылып жатыр, деп жазады Egemen.kz.

«Жайлы мектеп»: Алматы облысында 26 білім ошағы салынып жатыр

Мектеп құрылысының бюджеті - 6,6 млрд теңге. Жаңа оқу орнында сапалы білім алу үшін барлық жағдай жасалған. Мектепте оқу кабинеттерімен қатар, технологияларды өңдеу шеберханасы, спорт залы, мәжіліс залы, асхана, зертханалық және компьютерлік сыныптар, медицина кабинеті болады. Мердігер мекеменің өкілі құрылыс жұмыстары жыл соңына дейін аяқталатынын айтты.  

«AMANAT» партиясының сайлауалды бағдарламасы аясында өңірде 26 жайлы мектептің құрылысы қарқынды жүріп жатыр. Бұдан басқа биыл тағы 27 мектептің құрылысын бастау жоспарланған.  Ал Қаскелеңде салынып жатқан осы нысанның құрылыс жұмысы қазіргі уақытта 60 пайызға аяқталған. Мердігерлер мектепті уақытында бітіруге тиіс. Әрине, бірінші кезекте мектептің құрылысы жоғарғы деңгейде барлық талаптарға сай болғаны маңызды. «Жайлы мектеп» жобасы аясында салынатын мектептердің жиһазы толықтай отандық өнім болуы қажет, - деді Максим Рожин.

лл

Сапар барысында депутат отандық өнімнің сапасын бақылау мақсатымен жиһаз жасаумен айналысатын «Алатау Прогресс КЗ» серіктестігіне де барды. 100-ге жуық адамды жұмыспен қамтыған «Altamir» өндіріс цехының жұмысшыларымен кездесті. Еңбек ұжымына заңнамадағы жаңашылдықтар туралы айтып, партияның Сайлауалды бағдарламасы аясында атқарылып жатқан жұмыстарды баяндады.

Жиһаз цехының құрылтайшысы Бауыржан Молдабаевтың айтуынша, бүгінгі таңда осы зауытта өндірілетін мектеп жиһаздары тапсырыс берушілер тарапынан жақсы баға алып, оған деген сұраныс артып жатыр. 2023 жылдың қорытындысы бойынша өндіріс көлемі 2 миллиард теңгені құраған.

«Заманауи жиһаз да барлық қауіпсіздік талаптарына сәйкес болуы шарт. Соңғы кезде отандық өнім үлесінің артып келе жатқанын ерекше атап өтуге болады. Дегенмен, жеңіл өнеркәсіпте импорттың басым екенін ескерсек, отандық үлесті арттыру және дайын өнімді сату аумағын кеңейту жұмыстарын жалғастыру керек. Біз өз тарапымыздан көмектесуге дайынбыз», деді Мәжіліс депутаты.

Қазіргі таңда Еңбекшіқазақ, Қарасай, Жамбыл, Іле, Талғар аудандарында 39 мектеп үш ауысымда жұмыс істейді. 26 мыңнан астам оқушыға орын жетіспейді. Осы мәселені шешу үшін «AMANAT» партиясының облыстық 2023-2027 жылдарға арналған сайлауалды бағдарламасы аясында 53 мектептің құрылысы жоспарланған.