Сондай-ақ ол ШЫҰ-ның жоғары органы ұйымға мүше мемлекеттер басшылары кеңесінің отырысына қатысу өзі үшін үлкен мәртебе болғанына, ұйым басшылары кездесуінің қорытындысы туралы хабардар етудің маңызды екеніне тоқталды.
– Астана саммиті ұйым қызметінің барлық бағыты бойынша, әсіресе саясат және қауіпсіздік, сауда және инвестиция, көлік және энергетика, мәдениет және гуманитарлық байланыс бағытындағы көпжақты ынтымақтастықты дамыту келешегін талқылауға арналды. Іс-шара барысында халықаралық және өңірлік күн тәртібіндегі өзекті мәселелер төңірегінде мазмұнды пікір алмастық. Бұл ретте қауіпсіздікті қамтамасыз ету және ШЫҰ кеңістігіндегі «үш зұлым күшпен» күресудің қажеттілігі ерекше аталып өтті. Кездесуге қатысушылардың саммит барысында берген бағасына сүйенсек, Ұйым өз тарихының үшінші онжылдығында өзара сенім мен достық рәуіштегі тату көршілік қарым-қатынастарды нығайтудың, көпжақты диалогті кеңейтудің және өзара тиімді ынтымақтастықты тереңдетудің берік алаңына айналды. Қазіргі халықаралық қатынастар жүйесінде ол күрделі геосаяси жағдайларда тұрақтылықты сақтауда шешуші рөл атқаратын беделді құрылым бола алды, – деді Чжан Мин.
Сонымен қатар Бас хатшы ұйым аймағының тұрақты дамуы мен өркендеуін қамтамасыз ету, ШЫҰ Жарғысының мақсаттары мен міндеттерін қатаң сақтау, «Шанхай рухының» мызғымас қағидаттарын табанды түрде ілгерілету үшін түрлі саладағы іс жүзіндегі ынтымақтастықты одан әрі арттыру құлшынысы баса айтылғанын жеткізді.
Баспасөз мәслихатында Чжан Мин 25 құжат қабылданып, ШЫҰ-ға мүше мемлекеттер басшылары кеңесінің Астана декларациясы мақұлданғанын атап өтті.
– ШЫҰ-ның «Әділетті бейбітшілік, келісім және даму үшін дүниежүзілік бірлік туралы» бастамасын құру туралы шешім қабылданып, Циндао қаласы 2024-2025 жылдарға арналған ШЫҰ-ның мәдени және туристік астанасы мәртебесіне ие болды. Тату көршілік, сенім және серіктестік қағидаттары туралы мүше мемлекеттер басшылары кеңесінің мәлімдемесі ретінде МБК-ның 3 мәлімдемесі жарияланды, – деді Чжан мырза.
Бас хатшы саммиттің негізгі нәтижелерінің бірі ретінде Беларусь Республикасының ұйымға мүше ретінде қосылу үдерісінің аяқталуын ерекше атап өтті. Нәтижесінде, ШЫҰ мүшелері он мемлекетке дейін артты. Хатшылық делегациясы Бейжіңге оралғаннан кейін ШЫҰ «отбасы» елдерінің дипломатиялық өкілдіктері басшыларының қатысуымен ұйым штаб-пәтерінің алдында Беларусь Республикасының мемлекеттік туын көтерудің салтанатты рәсімі өтетінін хабарлады.
Бұдан бөлек, ол ШЫҰ және оның тұрақты жұмыс істейтін органдарының қызметін одан әрі жетілдірудің басым міндеттеріне, сондай-ақ кейінгі уақытта өте белсенді жұмыс атқарып келе жатқан ұйымды кеңейту үдерісіне ерекше мән берілетінін айтты.
Сөзінің соңына қарай еліміздің төрағалығына тоқталып, Қазақстан тарабы экономика, инвестиция, көлік, мәдени-гуманитарлық сала мәселелеріне, сондай-ақ экологиялық аспектілерге ерекше назар аударғанын жеткізді.
– Біздің ойымызша, Қазақстанның Ұйымға төрағалығы өте мазмұнды әрі қызықты болды. Ұйым қызметіне жаңа серпін беріп, оның тарихындағы тағы бір маңызды кезеңге айналған Астана саммиті бәріміз үшін тиімді де сындарлы және жемісті нәтижеге қол жеткізді. Осы мүмкіндікті пайдалана отырып, Қазақстан Республикасының Президенті Қасым-Жомарт Тоқаевты осы басқосудың және жалпы төрағалығының сәтті өтуімен ыстық ықыласпен құттықтағым келеді. Маған және Хатшылық делегациясына жұмыс барысындағы көрсетілген ерекше қолдау мен көмек үшін, сондай-ақ жылы шыраймен және қонақжай қалыппен қабылдағаны үшін Қазақстандағы әріптестерімізге алғысымды білдіргім келеді, – деді ұйым Бас хатшысы Чжан Мин.
Астана саммитінен кейін төрағалық эстафетасын Қытай Халық Республикасы қабылдады. Жалпы, Қытай ШЫҰ-ның негізін қалаушы ел саналады, әрі ұзақ жылдар бойы ұйымның дамуына барынша үлес қосып келеді.
