Мемлекет басшысы Қасым-Жомарт Тоқаев «Адал адам – Адал еңбек – Адал табыс» атты Ұлттық құрылтайдың үшінші отырысында «...Ауыл және аудан орталығының тұрғындарына арналған жаңа тұрғын үй бағдарламасын қолға алу керек. Бұл ретте әлеуметтік тұрғыда осал топтағы жандар үшін несие өсімі 7 пайыздан аспауы қажет. Сонымен қатар сатып алу құқығымен жалға берілетін баспана санын бірнеше есе көбейтуді Үкіметке тапсырамын», деген болатын.
«Аудан орталығында қос бірдей баспананың берілуі – мемлекеттік бағдарлама жүзеге асып жатқанының айқын көрінісі. Қазіргі таңда халықты тұрғын үймен қамтамасыз ету мәселесі өте өзекті. Бүгін тұрғын үй кезегіндегі екі отбасы баспанамен қамтылды. Жаңа шаңырақ иелеріне зор денсаулық, отбасы жылуын тілеймін», деді аудан әкімі.
Жаңа баспана үйі апатты деп танылған Асылзада Зұлқарнаеваға және 20 жыл еңбек өтілі бар, 2012 жылдан бері тұрғын үй кезегінде тұрған бюджеттік сала қызметкері Шалыққаным Бұйрашеваға бұйырды. Айта кетейік, бұл үйлер сатып алу құқығымен жалға беріліп отыр.
Қазіргі таңда Қазталов ауданында мемлекеттік бағдарлама аясында 28 ауылда 116 тұрғын үйдің құрылысы жүріп жатыр. Құрылыс сапасын аудан әкімі мен жергілікті қоғамдастық жіті бақылауға алған.
Батыс Қазақстан облысы
