Подстепный ауылдық округінің Юбилейный ауылында ашылған жаңа зауыттың тұсаукесеріне облыс әкімі Нариман Төреғалиев барды. Ауыл аумағынан су көзін сараптамадан өткізген отандық және ресейлік ғылыми зерттеу институттары бұл судың емдік қасиеті ерекше екенін байқапты. Мысалы, ересек адамның орташа тәуліктік қажеттілігі 200-300 мкг/дм3 десек, емдік-асханалық судың бір құтысында 60-100 мкг/дм3 йод бар екен. Бұл судың денсаулыққа өте пайдалы екенін көрсетеді.
«Бұл – Мемлекет басшысының тапсырмасына сәйкес жүзеге асып жатқан жобалардың бірі. Өңірге инвестиция тарту, кәсіп ауқымын кеңейтіп, елдің сұранысына сай қызмет көрсету күн тәртібінен түспейді. Облыс көлемінде келелі жобалар құлашын кеңге жайды. Өткен жылдың қорытындысына сүйенсек, инвестиция әкелу жоспарын 16 пайызға артық орындадық. Ал биыл 118 млрд теңгеге 26 жобаны іске қосқалы отырмыз. Міне, соның ішінде «Sartay» минералды таза суымыз – төртінші жоба», деді өңір басшысы Нариман Төреғалиұлы.
Облыс әкімінің айтуынша, осы жылдың соңына дейін өңірге 700 млрд теңгеге жуық инвестиция тартылады екен. Әрине, осы арқылы жаңа жұмыс орындары ашылып, табыс молая түспек.
«Batysminiralsu» зауытында 60 адам жұмыс істейді. Құрылыс кезінде 30 адам жұмысқа тартылған. Осылайша, қазірдің өзінде алақандай ауылдағы бір ғана зауыт 90 адамды жұмыспен қамтыған.
Зауыттың ашылу салтанатына Теректі ауданының әкімі Әлия Мұханбетжанова, осы жобаны қаржыландыруға атсалысқан «ForteBank» өкілдері қатысып, сәттілік тіледі. Жаңа кәсіпорынның есігіне керілген бауды облыс әкімі Нариман Төреғалиев пен зауыттың бас директоры Әлішер Оңталапұлы қиды.
Құны 1,5 млрд теңгені құрайтын жоба өнімінің атауы белгілі би және батыр Сартай Байжанұлының есіміне байланысты қойылған екен. 1711-1785 жылдары өмір сүрген, 15 жасында қол бастап, жауға тойтарыс берген тарихи тұлға жөнінде режиссер Ақан Сатаев «Жаужүрек мың бала» атты фильм де түсірген болатын. Айтпақшы, Сартай батырдың ашамайы Батыс Қазақстан облыстық тарихи-өлкетану музейінде сақтаулы тұр.
Батыс Қазақстан облысы
