Жиын барысында С.Жақыпова Мемлекет басшысының әлеуметтік-еңбек саласындағы тапсырмаларының іске асырылуы туралы баяндады. Атап айтқанда, базалық зейнетақының кезең-кезеңімен ұлғаюы, ынтымақты зейнетақыны есептеу үшін ең жоғары табыстың көбеюі, Әлеуметтік кодексті іске асыру аясында әлеуметтік қолдау шараларының күшеюі, Отбасының цифрлық картасын енгізу нәтижелері, ел азаматтарын жұмыспен қамту бойынша қабылданып жатқан шаралар жөнінде баяндады.
Сондай-ақ министр ең төменгі жалақыны анықтаудың жаңа әдістемесі, 2023–2027 жылдарға арналған көші-қон саясатының, 2024–2029 жылдарға арналған еңбек нарығын дамыту, 2030 жылға дейінгі қауіпсіз еңбек тұжырымдамалары туралы да тарқатып өтті. Ұзақ уақыт бойы зиянды еңбек жағдайларында жұмыс істеген адамдарды әлеуметтік қорғауды күшейту, мүгедектігі бар адамдардың өмір сүру сапасын арттыру бойынша қабылданып жатқан шаралар және платформалық жұмыспен қамтуды реттеу бойынша жүргізіліп жатқан жұмыстар жайы тілге тиек болды.
Кездесу барысында С.Жақыпова өңірдегі ағымдағы жағдайды талқылап, бірқатар проблеманы шешу жолдарын ұсынды. Мәселен, Алматы облысының халық саны 1,5 млн адамды құрайды, оның 16%-ы (246 мың) – қалалық, 84%-ы (1,3 млн) – ауылдық. 2050 жылға қарай халық саны 61%-ға артып, 2,4 млн адамға жетеді. Жұмыс күшінің саны – 751 мың адам, 2050 жылға қарай 1,1 млн адамға (+44%) дейін өседі. Бүгінгі таңда жалдамалы жұмыскерлердің үлесі – 68%, өзін-өзі жұмыспен қамтығандардың үлесі 32%-ды құрайды. Жұмысқа жарамды жастар саны – 400 мың адам (56%). Ұлттық статистика бюросының мәліметтері бойынша жұмыссыздық деңгейі 4,6%-ды құрайды. Өңірдегі орташа жалақы – 227,4 мың теңге, бұл жалпы республикалық көрсеткіштен төмен.
«Өңірде акушер-гинекологтердің, неонатологтердің, педиатрлар мен анестезиолог-реаниматологтердің тапшылығы, сондай-ақ ауылдық округтер мамандарының компьютерлік сауаттылығының төмен деңгейі байқалады. Мемлекет шығындары 164,3 млрд теңгені құрайтын ұлттық жобаларды іске асыру шеңберінде жыл басынан бастап республика бойынша 2,4 мың жұмыс орны немесе оның жалпы санының 4% ғана құрылды», деп атап өтті министр.
Сала басшысы медициналық мамандықтар бойынша кадрларды даярлауды ұлғайтуды және онлайн-оқыту арқылы қызметкерлердің компьютерлік сауаттылық деңгейін арттыруды ұсынды.
«Жыл сайын құрылатын сапалы жұмыс орындарының санын 2024 жылғы 98 мыңнан 2029 жылы 160 мыңға дейін ұлғайту қажет. 2025 жылға қарай жұмыссыздық деңгейін 4,5%-ға дейін төмендетуді, экономикадағы орта кәсіпкерлік үлесін 21,1%-ға дейін ұлғайтуды қамтамасыз ету маңызды. Халықты жұмыспен қамту саласында мемлекеттік қолдаудың барлық құралын қолдану қажет», деді ол.
Алматы облысының активімен кездесуде С.Жақыпова әлеуметтік-еңбек саласының бірнеше ақпараттық жүйесінің мүмкіндігін көрсетті. Министр отырысқа қатысушыларды Еңбек тәуекелдерінің цифрлық картасымен және еңбек қатынастары және еңбек қауіпсіздігі мен еңбекті қорғауды қамтамасыз ету салаларында мониторинг пен бақылауды жүзеге асыруға мүмкіндік беретін Кәсіпорындардың цифрлық картасымен толыққанды таныстырды. Қазақстандықтардың әл-ауқаты деңгейін анықтаудың және проактивті форматта мемлекеттік қолдау шараларын көрсетудің негізгі құралы ретінде Отбасының цифрлық картасына және халықты жұмыспен қамту саласында қызметтер мен мүмкіндіктердің кең спектрін ұсынатын Электрондық еңбек биржасына ерекше назар аударылды.
Алматы облысы
