Шілденің 16-сы күні Кеген ауданының Ақсай ауылының маңындағы таулы аймақта жауын-шашынның мол түсуінен жазықты түгел су басты. Ағыны күшті судан жол бойындағы 2 жүк көлігі жол жиегіне шығып кеткен. Төтенше оқиға орнына Кеген, Еңбекшіқазақ және Ұйғыр аудандарынан арнайы техникалар тартылып, жолдың лай су басқан тұстарын тазартып, көлік қозғалысын қалыпқа келтіру жұмыстарын жүргізді.
Оқиға орнына ТЖД, ПД, әкімдік өкілдері мен «ҚазАвтоЖол» мекемесінен 17 қызметкер жедел түрде жұмылдырылды. Түс ауа толассыз жауған жаңбыр тоқтап, су деңгейі төмендеді.
Сондай-ақ осы күні Жамбыл ауданының Беріктас ауылында да толассыз жауған жаңбыр салдарынан көлбеу су ағыны пайда болып, 15 аула аумағы мен 3 тұрғын үйді су басты. Осыған байланысты ТЖД бөлімшелері мен жергілікті атқарушы органдар инертті материалдар салынған 2 мың қапшық дайындады. Сонымен қатар су басқан аумақтан суды сору және лайдан тазарту жұмыстарын жүргізіп, орын алған оқиғаға мониторинг жасалғаны туралы ТЖД-нің баспасөз қызметі хабардар етті.
Бұл жұмыстарға ТЖД, жергілікті атқарушы органдардың, ТЖМ 28237 әскери бөлімінің жеке құрамынан 100-ден астам адам, 11 мотопомпа мен 16 бірлік техника жұмылдырылған.
Алматы облыстық ТЖД тұрғындарға жауын-шашын мол түсіп жатқан таулы өңірлерде сақтық шараларын сақтауды және ауа райы болжамына назар аударуды ескертеді.
Алматы облысы
