«Алматы қаласында да осындай мектеп салу жоспарланып отыр. Осыған байланысты біз бүгін тәжірибе алмасу үшін Алматы қаласы құрылыс басқармасының басшысы мен жобалау институтының басшыларын да осы нысанға шақырдық. Мұндай мектептердегі сыныптардың ауданы 60-62 шаршы метрді құрайды, бұл балалардың білім беру үдерісіне қолайлы жағдай туғызады. Болашақта қазақстандық мектептер осындай болуы тиіс. Спорт алаңдары да осы стандарттарға сай болуы керек», деді сенатор.
Депутат сапар барысында Алматы қаласындағы жол кептелісі мәселесіне де назар аударды. Ол қаланың ең көп жүретін учаскелерінің бірі Құлжа трактісіндегі жолды кеңейту барысымен танысты. Депутатқа жолды кеңейтіп, жолақтар санын көбейту жұмыстары биыл 1 қыркүйекке дейін аяқталатыны туралы хабарланды. Құлжа трактінде осыған дейін 4 жолақ болса, енді әр бағытта 3-ке дейін көбейтіледі және жалпы алғанда 6 жолаққа кеңейтілетін болады. Бұл қаланың шығысындағы кептелісті едәуір азайтады.
