Кazinform.kz хабарлағандай, жарыстан шыққан бетте Қазақстан тілшілеріне ел үмітін ақтай алмағаны үшін кешірім сұрап, ағыл-тегіл көз жасына ерік берген еді. Бүгін Әбужақынованың жеке бапкері Нұрбол Сүлейменов алғаш рет шәкіртінің қазіргі көңіл-күйі қалай екенін айтып берді.
«Жеңіліп қалғаннан кейін бір күнге дейін ешкіммен сөйлескен жоқ. Жылай берді. Мен де ештеңе айтпадым, сөйлеспедім. Ондай кезде бірдеңе айтудың өзі артық. Ертеңіне ашуы басылып, өз-өзіне келгеннен кейін ғана сөйлестім. Қазір көңіл-күйі дұрысталып қалды», деді бас бапкер.
Сонымен қатар Әбиба Әбужақынованың осыған дейінгі ешкімге айтпаған құпия жоспарын да айтып қалды.
«Әбибаның өзінің осыған дейін ешкімге айтпай келе жатқан жоспары болған. «Егер осы Парижде жүлдеге қол жеткізіп, чемпион болсам, спорттық мансабымды аяқтаймын» деген. Өкінішке қарай, ол жоспары орындалмады. Енді бүгін сөйлессем, «аға, мен бәрібір, Олимпиада жүлдесін алмай спортпен қоштаспаймын» деді. Негізі Әбиба өте намысшыл қыз. Қайсар қыз», деді оның жеке бапкері Нұрбол Сүлейменов.
Естеріңізде болса Әбиба Әбужақынова Олимпиада ойындарын 5-орынмен аяқтаған болатын.
