Балалар үйінің тәрбиеленушілері әдетте кәмелет жасқа толғаннан кейін қиын жағдайға тап болады. Өйткені жақын жанашыры жоқ жас үлкен өмірге қадам басқан кезде өмірдің түрлі қиындығына дайын болмай қалуы мүмкін. 2000 жылы Орал қаласында ашылған «Шаңырақ» жасөспірімдер үйі балалар үйінен тәрбиеленіп шыққан жастарға жақсы мүмкіндік болды. Бірақ арада біраз жыл өткенде «Шаңырақ» ғимараты әбден тозып, күрделі жөндеуді қажет етті. Ашылғалы жібі түзу жөндеу көрмеген ғимараттың шатыры шұрқ тесік болып су кетсе, ортақ әжетхана мен ортақ ас бөлмесі де тұрғындарға жайсыздық туғызатын.
Өткен жылы өңір басшысы Нариман Төреғалиев осы «Шаңырақ» жасөспірімдер үйінің жұмысымен таныса келіп, ғимараттың жағдайын көзімен көрген еді. Жатақхана тұрғындары ең алдымен нысанға күрделі жөндеу қажеттігін айтты. Жалпы, бұл мәселе кейінгі 10 жылға жуық уақыт бойы көтерілгенімен, шешімін таппай жүрген екен. Облыс әкімі жергілікті бюджет қаражатынан 575 млн 974 мың теңге ақша бөліп, тозығы жеткен нысанға былтыр күзде жөндеу басталды. Ғимараттың іші-сыртымен бірге айналасы да абаттандырылды. Осы уақыт ішінде облыс әкімі жөндеу жұмысының сапасын өзі бақылап отырды. Енді міне, ғимарат су жаңа қалыпқа еніп, тұрғындарға есігін қайта айқара ашты.
– Былтыр осы құрылыс басталған кезде келіп, бәрі ойдағыдай болатынын айтқан едім. Міне, біз уәдемізде тұрдық. Әлеуметтік осал топтағы азаматтарды қолдауды жалғастыра береміз. Осының бәрі – ата-анасыз, жетім қалған балаларға жасалып жатқан мемлекет қамқорлығы. Бұл ғимарат өте оңтайлы жерде орналасқан. Орта мектеп те, балабақша да жақын. Балаларын мектепке, балабақшаға беріп, ата-аналары алаңсыз жұмысын істейді, – дейді Н.Төреғалиев.
Шынында да алғаш рет 1958 жылы салынған нысан күрделі жөндеуден кейін су жаңа қалыпқа енген. 106 адамға арналған жатақханада 74 тұрғын бөлмесі бар. 3 қабатты ғимаратты жөндеу ісін мердігер «ТасқалаТрансГаз» ЖШС жүргізген.
– Жөндеуге дейін төбеден су тамып, есік-терезелерден жел өтетін еді. Қазір ғимарат түгелдей жаңарып қалды. Жарық, жылы, таза. Кәріз жүйесі де жөнделді. Бәрі көңілімізден шықты, – дейді жасөспірімдер үйінің тұрғыны, көпбалалы ана Айдана Тәжібаева.
«Шаңырақ» жасөспірімдер үйінің директоры Өмірбай Қалымбетовтің айтуынша, қазір мұнда балалар үйінің 89 түлегі тұрып жатыр екен. Соның ішінде 17 отбасы – жетім балалар үйінің түлегі. Оның 12-сі – жалғызбасты аналар. Қалғаны – жастар. Мұндағы бөлменің көбі жалғыз адамға арналған. Ал 24 бөлме балалы отбасыларға арналып жабдықталды. Ол жерде балалы отбасылар тұрып жатыр. Кәмелетке толмаған балалардың жалпы саны – 72.
Әу бастағы талап бойынша «Шаңырақ» үйінде тек жастар мен жасөспірімдер ғана тұруы керек еді. Алайда басқа барар жері болмаған балалар үйінің бұрынғы тәрбиеленушілері бұл жерде ұзақ тұрақтап қалып жатады. Қазірдің өзінде мұнда жасы
50-ден асып кеткен тұрғындар да бар. Олар «Шаңырақ» үйінің бұрынғы жағдайын жақсы біледі.
– Бұрынғы жатақханамыздың жағдайы өте нашар, сасық, тарақан қаптаған жайсыз еді. Төбемізден су кететін, есік саңылауынан жел кіретін. Қазір бәрі жақсы. Түгелдей жаңаланған. Қаланың жайлы пәтерінен айырмасы жоқ, – дейді А.Тәжібаева.
Айта кетер жайт, жасөспірімдер үйінің сырты да абаттандырылған. Балаларға арналған ойын алаңы, жастарға воркоут спорт алаңы жасақталған. Кең автотұраққа арнайы шлагбаум орнатылыпты.
– Біз жатақхана тұрғындарына арнап балалар ойын алаңын да жасап бердік. 1 600 шаршы метр алаңға автокөлік тұрағы мен жолдар жасалды, өрнектас төселді, – дейді мердігер компания басшысы Тілек Махметов.
Батыс Қазақстан облысы
