Кеніштегі жұмыс қашан жанданады?

Ендігі мәселе кеніштің қайта іске қосылуына қатысты болып отыр. Се­бебі кен байыту комбинаты ке­йін­гі жарты жылда қалдық кенмен жұ­мыс істеп, әлеуеті төмен­деп қал­ған. Ал кәсіпорында мың­ға жуық қыз­меткер нәпақа тауып отыр.

Бұған дейін жазғанымыздай, кеніштегі апат пен оның маңын­дағы үйлердің мәселесін прокуратура құрған тергеу тобы зерделеп жатқанына байланысты шахтадағы кен қазу жұмыстары 4 қаңтардан бері қаңтарылып қалған еді. Сол уақытта 185 жұ­мыс­шы жалақысының 50 пайызы сақталуымен мәжбүрлі дема­лысқа жіберілген. Кейін олардың біраз бөлігі кәсіпорынның өзге құрылымдық бөлімшелерінен жұмыс тапса, кейбірі өзге кәсіп­орындарға ауысып кетті.

Ал 25 шілде күні құтқару­шы­лар шахта маңындағы ойық­қа тү­сіп қаза болған соңғы құт­қа­ру­шы­­ның денесін алып шықты. Ол – 56 жастағы Айып Тілеубергенов. Марқұм кәсіби әскерилендірілген авариялық-құтқару қызметтерінің респуб­ли­калық орталық штабы Павлодар филиалында жедел автокөлік жүргізушісі болып еңбек еткен. Ол еңбек жолын алғашқыда құқық қорғау саласында тәртіп сақшысы болып бастаған. Кейін денсаулығына байланысты бұл саламен қош айтысуға тура келіпті. Одан соң әр жылдары «Май­қайыңалтын» АҚ-да, Май­кө­бедегі көмір кенішінде, кейінгі 6-7 жылда кәсіби әскери­лендірілген авариялық-құт­қару қызметтерінің респуб­ли­калық орталық штабы Павлодар филиа­лында еңбек еткен.

Осылайша, автобуспен құр­дымға құлап қаза тапқан төрт құтқарушының да мүрдесі табылды. Ендігі ретте «Май­қайың-алтын» АҚ-ның қыз­мет­керлері шахтаның тезірек ашылуын күтіп отыр. Себебі кейінгі жарты жыл бойы кәсіпорынның кен байыту комбинаты қалдық кенмен жұмыс істеп келген.

Апат болған алтын кеніші өз жұмысын қашан жал­ғастырады? Бұл сауалды Төтен­ше жағдай­лар министрлігі Өнер­кәсіптік қауіпсіздік комитетінің Па­в­ло­дар облысы бойынша де­пар­­та­мен­тінің басшысы Алмаз Олжа­ғұловқа қойдық.

– «Майқайың-алтын» АҚ-на қарасты алтын кеніші маңындағы апат салдарынан ішінде төрт құт­қа­рушы бар автобус топырақ арасына құлап кеткені мәлім. Міне, арада жеті айға жуық уақыт өткенде соңғы құтқарушы қазып алынды. Марқұм құтқару­шы­лар­дың туыстарының көңілі орнына түсті деп ойлаймыз. Ал алтын шахтасының қайтадан іске қосы­луы туралы мәселе жақын күн­дері белгілі болып қалады. Бұл үшін ең әуелі кен өндіруші кәсіпорын біздің департаментке тау-кен жұмыстарының жо­с­парын ұсынуы керек. Оны рес­­публикалық комитетіміз құп­таған жағдайда шахта өз жұ­мысын жалғастыра алады. Бұған дейін арнайы комиссия жер астындағы шахтаның жай-күйін зер­делеп, 33 тармақтан тұра­тын кем­шілікті жою туралы ұй­ға­рым­ды акционерлік қоғам бас­шы­лы­ғына жөнелткен. Бұл олқы­лық­тар­дың орны толтырылып, кеніш өз жұ­­мысын бастауға дайындалып жат­­қаны анық, – деп жауап берді А.Олжағұлов.

Бұған дейін Астана соты алтын кенішіндегі қайғылы оқиға толықтай «Майқайың-алтын» АҚ-ның кінәсінен болған деген шешім шығарған еді. Ал Еңбек және әлеу­меттік қорғау комитетінің төраға­сы Төлеген Оспанқұлов Май­қайыңдағы апат бойынша ­ 21 адам кінәлі деп танылуы мүмкін екенін айтқан.

Айтып өтейік, құрдымға құла­ған автобус­та Айып Тілеу­­­бергеновтен бөлек, Бер­діхан Сарқыт, Олег Тышкович, Айдос Шаймерден болған еді.

 

Павлодар облысы,

Баянауыл ауданы,

Майқайың кенті