Жалпы жүлде қоры 24 900 000 теңгені құраған жарыс бәйгенің 4 түрі: құнан бәйге, топ бәйге, жорға жарыс және аламан бәйге бойынша өтті.
– Бұл бәсеке – бәйгеден ел чемпионатының 8-кезеңі. Ал бір жағынан осы күзде Астанада өтетін V Дүниежүзілік көшпелілер ойындарына іріктеу есебінде өтіп жатыр. Ат жарысына еліміздің түкпір-түкпірінен ең үздік жылқылар жиналды. Олар бәйгенің төрт түрінен, яғни құнан бәйге, топ бәйге, аламан бәйге және жорға жарыс аталымы бойынша сынға түседі. Әр бәйге түріне шамамен 25 тұлпар қатысты. Бұл аттардың жағдайы жақсы, алдағы үлкен додаға дайын, – деді «Бәйге» федерациясының атқарушы директоры Алтай Бимен.
Құнан бәйгеден бірінші болып келген «Қамысқұлақ» атты тұлпардың шабандозы Асланбек Абдықал жеңіс жолында бапкердің кеңесі көмек болғанын айтады.
– Бапкердің айтуымен шауып отырдым. Ол маған жарыс бастала сала алдыңғы топта болуға кеңес берді. Соңғы айналымда бірінші болып алға оздым. Мәреге 500 метр қалғанда артымнан тағы бір ат келе жатты. Жетіп ала ма деп қорқып едім, бірақ мен бірінші келдім. Енді көшпелілер ойындарына дайындаламын, – деді жас шабандоз Асланбек Абдықал.
2-орынға «Найза» атты құнан ие болды, шабандозы – Арнат Мұратхан. Жүлдегерлер үштігін «Айшуақ» атты атқа мінген Аңсар Арыстанбек түйіндеді.
Топ бәйгеде шабандоз Әлихан Жәнібекұлы «Ғасыр» атты сәйгүлікпен мәре сызығын бірінші болып кессе, 2-орынды Ділнұр Нұрмұқаш «Равшан» атты тұлпарымен, 3-орынды Қайыржан Әлихан «Тәуекелге» мініп жеңіп алды.
Жорға жарысының қорытындысына келсек, 1-орында – «Орда» (шабандозы Юрий Лымарь), 2-орында – «Выпуск» (шабандозы Әнуарбек Абдрахманов), 3-орында – «Ақжауын» (шабандозы Ербұлан Тілеғалиұлы).
Аламан бәйгенің нәтижесі бойынша 1-орынды «Софлор Лэнд» атты айғыр иеленсе (шабандозы Әмір Аманұлы), 2-орынды «Береке» (шабандозы Иринат Санжар), 3-орынды «Шайкүрең» (шабандозы Арнат Мұратхан) ұтты. Іс-шараның серіктестері – Ұлтық спорт қауымдастығы, республикалық «Бәйге» федерациясы және Павлодар облысының әкімдігі.
Еске сала кетейік, республикалық «Бәйге» федерациясы Қазақстан Республикасы Ұлттық спорт қауымдастығының құрамына кіреді. Қауымдастық құрамында бұдан өзге «Аударыспақ», «Көкпар», «Теңге ілу», «Садақ ату», «Жамбы ату», «Құсбегілік», «Асық ату», «Joryq» ат спорты т.б. федерациялар бар. Ұлттық спорт қауымдастығын белгілі кәсіпкер, меценат, «Altyn Qyran Foundation» қоғамдық қоры қамқоршылық кеңесінің төрағасы Исламбек Салжанов басқарады.
Биыл 8-13 қыркүйекте Астана қаласында V Дүниежүзілік көшпелілер ойындары өтеді. Іс-шараға 89 елден 2 мыңнан аса спортшы қатысады деп жоспарланған. Астанада өтетін Дүниежүзілік көшпелілер ойындарында барлығы 21 спорт түрінен 97 медаль жиынтығы сарапқа салынады.
Павлодар
