Көлік иесі – Аслан Жазықовтың мамандығы суретші емес. Бірақ бала кезінен сурет салуды ұнатады. Қолы босаған сәтте ойында жүрген бейнелерді, табиғат көрінісін ақ қағазға түсіреді.
«Жаһан жұрты секілді қазақтың да назары Париждегі Олимпия ойындарына ауып отыр. Өйткені Токиодағы бәсекеде еліміздің спортшылары алтын жүлде алмағаннан кейін осы Олимпиададан үміт күттік. Төртжылдық доданың алғашқы күні сол үмітімізді саңлақ дзюдошы Елдос Сметов ақтады. Қарсыласының бәрін жеңіп, қазақ дзюдошыларының арасынан тұңғыш Олимпиада чемпионы атанды. Татами тарланбозының бұл жеңісі қазақ халқының мерейін өсірді. Көк байрағымызды желбіретіп, Әнұранымызды шырқатты. Осы сәтті теледидардан көріп, қуаныштан қатты толқыдым», дейді А.Жазықов.
Сол кезде ол Олимпиада чемпионының суретін бейнелеу туралы ойға бекініпті. Ал көлігінің әйнегіне салу үшін сіріңкенің талы мен мақта таяқшасын қолданған.
«Көлігімнің әйнегі шаң еді. Соны ұтымды пайдаланғым келді. Сөйтіп, Елдостың портретін сала бастадым. Чемпионның суреті сәтті шықты. Мұны көрген жүргізушілер де, жаяу жүргіншілер де көлігімді фотоға түсіріп алып жүр», дейді әуесқой суретші.
Елдостың портреті – алғашқы туындысы емес. Бағдарламашы мамандығын меңгерген Аслан Жазықов бұған дейін де бірнеше спортшының портретін салыпты.
«Бұрын Геннадий Головкин мен Серік Бибосыновтың, Шафхат Рахмоновтың портретін салған едім. Ал алғаш рет «ВАЗ-2109» көлігінің артқы әйнегіне 2016 жылы Англия чемпионы атанған «Лестер сити» футбол командасының эмблемасын бейнеледім. Бұл суретімді BBC сайты «қазақстандық жанкүйердің туындысы, бірақ авторы белгісіз» деп жариялады», дейді А.Жазықов.
Қазір әуесқой суретшінің үш баласы бар. Оның 9 жастағы қызы Дария дзюдо секциясына қатысып жүр.
Атырау облысы
