Сарабдал саясаттың салтанаты

Елбасы Қазақстан Республикасы Президентін сайлау нәтижелері бойынша еxit-poll қорытындысын жариялау рәсіміне қатысты, деп хабарлады Президенттің баспасөз қызметі. Іс-шара барысында еxit-poll нәтижелері жарияланған жаңа­лықтар шығарылымы көрсетілді. Оның қорытындысына сәйкес, президенттік сайлауда Нұрсұлтан Назарбаев ең көп дауыс жинады. Жиналғандарға арнаған сөзінде Қазақстан Президенті бүкіл Қазақстан халқына ризашылығын білдірді. – Мен әрбір азаматқа, әрбір отбасына маған ел дамуындағы бүкіл Тәуелсіздік жылдары бойы сенім артқаны және осы жолғы сайлауда қолдағаны үшін ризамын. Кезектен тыс президенттік сайлау өткізу идеясы Қазақстан халқы Ассамблеясына тиесілі. Бұл шешімді қазақстандықтар қолдады. Менің кандидатурамды ұсынғаны үшін «Нұр Отан» партия­сына рахмет айтқым келеді, партия мүшелері жергілікті жерлерде белсене жұмыс жүргізді. Сондай-ақ, Республикалық қо­ғам­дық штабқа да ризамын. Оның өкілдері бүкіл республиканы аралады, халықпен кездесіп, елде жүргізіліп жатқан саясатты түсін­дірді. Барлық сенімді өкілдер мен белсенділерге алғыс айтамын, – деді Мемлекет басшысы. Нұрсұлтан Назарбаев атқа­рылып жатқан жұмыстарды рес­публика азаматтарының тағы да қолдағанын атап өтті. – Осындай жалпыға ортақ сенім болмаса, алға қойылған міндеттерді жүзеге асыру қиын болар еді. Сайлауға рекордтық қатысу көрсеткіші қазақстандықтардың бірлігін, тұрақты мемлекетте өмір сүруге деген құлшынысын, сондай-ақ, мен ұсынған бағдарламаларды қолдауын көрсетті. Осының бәрі Отанымыздың болашағы мен өркендеуі үшін еселенген күш-қуатпен жұмыс істеуді міндеттейді, – деді Қазақстан Президенті. Мемлекет басшысы қазақстан­дық­тардың тұтастығын, дамуға және болашақ ұрпақ үшін биік мақсаттарға бірлесіп жетуге деген талпынысын көрсет­кен сайлаудың  тарихи мәніне назар аударды. – Сайлау барысында заңнама талабы толық сақталды. Сайлауды байқауға көптеген шетелдік байқаушылар мен журналистер келді. Қазақстан әлемдік қоғамдастыққа биік саяси мәдениет пен демократия қағидаттарын паш етті, сол арқылы өз деңгейін әлем алдында тағы бір сатыға көтерді, – деді Нұрсұлтан Назарбаев. Қазақстан Президенті ел алдына қойылған ауқымды мақсаттарға жету үшін барлық мүмкіндіктер бар екенін айтты. – Бізде білікті мамандар, жеткілікті қаржы-қаражат, саяси орнықтылық, халықтың бірлігі мен достығы бар. Біз индустрияландыру, «Нұрлы Жол» бағ­дар­ламасы аясында қойылған міндет­терді орындаймыз, Қазақстанның әлемдегі дамыған 30 елдің қатарына кіруін қамта­масыз етіп, қазақстандықтардың тұрмысын жақсартамыз, – деді Мемлекет басшысы. Соңында Нұрсұлтан Назарбаев Қа­зақ­стан халқына бақ-береке және табыс  тіледі. Іс-шара барысында Мемлекет басшысы сондай-ақ, үзеңгілестерімен жә­не республикалық қоғамдық штаб мүше­лерімен әңгімелесті. * * * Қазақстан Республикасы Прези­дентінің сайлауы барысында Демократия институты елдің барлық өңірінде жалпыұлттық еxit-poll жүргізді. Зерттеулер 14 облыс­ты, сондай-ақ Алма­ты және Астана қалаларын қамтыды. Exit-poll сағат 7.00-ден 20.00-ға дейін 550 сайлау учаскесінде, соның ішінде 312 қалалық және 238 ауылдық сайлау учаскесінде өткізілді. Exit-poll-ды ұйымдастыру және өткізу ісіне 1500-ден астам адам тартылды. Қол­данылған сауалдама әдісін шетелдік және қазақстандық ғалымдар бірнеше рет сынақтан өткізген, бұл сенімді, репре­зентативті мәлімет алуға мүмкіндік береді. Қазақстан Республикасы прези­дент­тігіне кандидаттар бойынша еxit-poll нәтижесі мынадай болды: Н.Назарбаевқа – 97,5%, Т.Сыздықовқа – 1,87%, А.Құ­сайы­новқа  0,63% дауыс берілген. АСТАНА

ҚАЗАҚ ЕЛІ БАС ИІП ПАРАСАТҚА, АЗАМАТЫН МІНГІЗДІ АҚБОЗ АТҚА!

Кеше Президент Нұрсұлтан Назарбаев Астанадағы Оқушылар сарайында орналасқан №81 сайлау учаскесіне келіп, Қазақстан Президентінің сайлауында дауыс берді. Дауыс бергеннен кейін бұқа­ра­лық ақпарат құралдарының өкіл­деріне берген сұхбатында Н.На­зарбаев мемлекеттің тағы бір тарихи науқанды басынан өтке­ріп отырғандығын атап көрсет­ті. «Халықтың талабымен, Қазақ­стан халқы Ассамблеясының ұсы­нысымен кезектен тыс прези­денттік сайлауды өткізу мәселесін қол­дадық. Бүгін еліміз үшін маңызды сайлау өтіп жатыр», – деді Елбасы өз сөзінде. Мемлекет басшысы дауыс беру құқына ие 9,5 миллионға жуық қазақстандық 9700-ден аса сайлау учаскесінде сайлауға қаты­сып жатқанын атап өтті. «Бүгін аза­маттар конституциялық парызын өтеу құқығына ие. Екінші жағы­нан, олардың өз болашағын таң­дауға, биліктің қызметіне баға беруге мүмкіндіктері бар. Қазақ­стандықтар ең алдымен еліміз­дің тұрақты дамуы үшін, халық тұрмысының жақсаруы үшін, өзінің және балаларының бола­шағы үшін, сондай-ақ, менің басшы­лы­ғыммен елде жүргізіліп жатқан саясатты қолдау үшін дауыс беретініне сенімдімін», – деді Қазақстан Президенті. Нұрсұлтан Әбішұлы сайлаудың транспаренттілігіне де назар аударды. «Сайлау үдерісі мен дауыс беру барысын іс жүзінде 40-қа жуық ел мен халықаралық ұйымдар атынан өкілдік еткен 850-дей шетелдік байқаушылар бақылауда. 170-ке тарта шетелдік БАҚ тіркелді. Біз бүкіл әлемге заңдылықтың сақталуын, ашықтықты көрсетіп отырмыз. Байқаушылар әділ бағасын береді деп санаймын және сайлауға қатысып, қызығушылық танытқаны үшін баршаға алдын ала рахмет айтқым келеді», – деді Қазақстан Президенті. Сонымен қатар, Мемлекет басшысы осы сайлауда қазақстандықтар өзіне сенім білдіретін болса, бірінші кезектегі әрекеті бес институттық реформаны жүзеге асыру бойынша комиссия құру болатынын айтты. «Бұл комиссия бес кіші топтан тұратын болады, олар заңнамаға өзгеріс енгізуді қажет ететін ауқымды әрі күрделі жұмыс күтіп тұрғандықтан, дереу іске кіріседі. Жалпы, бұл реформалар ел дамуының кезекті кезеңі болып саналады және экономиканы, саясатты, қоғамды қамтиды, сондай-ақ, транспаренттілік пен ашықтық үшін қажетті жағдай жасайды», – деді Н.Назарбаев. Оқушылар сарайында орналасқан №81 учаскесіне жалпы 2532-ге тарта азамат тіркеліпті. Таңсәріден тұрып, сайлау учаскесіне келіп, дауыс берген азаматтардың саны таңғы сағат 10.00-де 543-ке жуықтаса, күндізгі сағат 11.00-ден аса 600-ге жақындап үлгерді. Біз таңертең ерте тұрып, сайлау учаскесіне келіп, дауыс берген елорда тұрғындарының арасынан 68 жастағы Мәрзия Қуанышқалиеваны кезіктірдік. «Мен бұған дейінгі сайлауларға да үзбей қатысып келемін. Бұрын Атырауда тұрған едім. Астанаға келгеніме 4 жылдай уақыт болды. Сайлау – қоғам үшін айтулы оқиға. Біздің отбасымызда 4 адам бар. Олардың барлығы бүгін сайлау учаскелеріне барып, мен сияқты өз таңдауларын жасады. Біз еліміздің, мемлекетіміздің, балалардың болашағы үшін дауыс беруге келдік. Елімізде әрдайым тыныштықтың болғанын, келісімнің орнағанын қалаймыз», – деді сайлаушы бізбен әңгімесінде. Елдегі саяси науқанға қатысуды өзінің парызы деп санаған Ғалымжан Әкімов Астанаға Батыс Қазақстан облысынан 2000 жылы қоныс аударыпты. 54 жастағы сайлаушының 3 баласы болғанымен, екеуінің ғана дауыс беруге құқығы бар екен. Ол өздерінің Қазақстанның дамуы мен өркендеуі үшін дауыс бергенін жеткізді. Бұл күні сайлау үдерісін қадағалау үшін №81 сайлау учаскесіне 29 бай­қаушы келсе, олардың 12-сі халықаралық бай­қаушы. Біз халықаралық байқау­шының бірі, сербиялық депутат Драгомир Карич­тен сайлау үдерісіне қатысты ойын білдік. Ол сайлауды байқау үшін Қазақ­станға арнайы шақыртумен келген екен. «Бүгінгі сайлау өте жақсы, тіпті, мерекелік көңіл-күйде өтіп жатыр десем, артық айтқандық болмас. Мұны халықтың жылы жүздерінен-ақ байқауға болады. Кейбір азаматтар өз отбасыларымен, тіпті, кішкентай балаларымен келіп, дауыс беріп жатты. Бір сөзбен айтқанда, сайлау ауаны маған дұрыс әсер етті», – деді Г. Карич. Сербиялық байқаушының айтуынша, Қазақстан – Орталық Азия аймағындағы саяси, экономикалық тұрақтылықты қамтамасыз ету бағытын ұстанып келе жатқан бірден-бір ел. «Сондықтан, бұл сайлау осы елдің одан әрі ілгерілеуіне белгілі бір деңгейде қозғау салады деп ойлаймын», – деді Г.Карич сөзінде. Ал француз байқаушысы Оливье де Тиллиенің Қазақстанға үшінші мәрте келуі екен. Ол өз сөзінде Қазақстандағы сайлау мен Франциядағы сайлау үдерістерінің айырмашылықтарына тоқталып өтті. Оның айтуынша, Франциядағы сайлау науқандарына халық көп қатыспайды екен. «Еуропада, оның ішінде Францияда да кезектен тыс сайлау деген болмайды. Яғни, бізде сайлаудың мерзімі алдын ала, нақты бекітіледі. Сайлауға дайындық шаралары, электоратты науқан жұмыстары ұзақ жүргізіледі. Сіздерде бұл жағынан өзгешеліктердің бар екенін байқадым. Менің ойымша, кезектен тыс сайлау кандидаттарға өз бағдарламаларын дайындауға, насихаттауға аз ғана уақыт беретін секілді», – деді ол. Осылай дей келе, шетелдік байқаушы жалпы алғанда, елдегі сайлау үдерісі оң сипатта өтіп жатқанына тоқталып, байқаушы ретінде өзінің көңілі толатынын жеткізді. Бұл күні өздерінің сайлау учас­келерінде Қазақстан Республикасының Премьер-Министрі Кәрім Мәсімов, Пар­ламент Сенатының Төра­ға­сы Қасым-Жомарт Тоқаев, Парламент Мәжі­лісінің Төрағасы Қабиболла Жа­қыпов, Мемлекеттік хатшы Гүлшара Әбдіқа­лықова дауыс берді. Қазақстан Коммунистік халықтық партиясынан президенттікке кандидат Тұрғын Сыздықов Астана қаласындағы №32 сайлау учаскесінде дауыс берді. Президенттікке кандидат Әбілғазы Құсайынов та сайлауда өз таңдауын жасады. Ол дауыс берген учаскедегі сайлау науқанын халықаралық сарапшы ретінде тіркелген Ресей Мемлекеттік Думасының депутаты, танымал боксшы Николай Валуев бақылап отырды.