Алдымен Президент тапсырмасын орындау мақсатында еліміздің Жоғары білім мен ғылымды дамытудың 2023-2029 жылдарға арналған тұжырымдамасына жоғары білім беру сапасын және ғылыми зерттеулердің нәтижелілігін арттыруға бағытталған өзгеріс енгізілді. Мәселен, жоғары оқу орындарындағы профессор-оқытушы құрамының жалақы мөлшері 160,7 мың теңгеден 350 мың теңгеге дейін, ұлттық жоғары оқу орындарында 228,8 мың теңгеден 400 мың теңгеге дейін өсті. Ал былтырғы бірінші қаңтардан бастап ғылыми ұйымдар қызметкерінің лауазымдық жалақысы 18 пайызға артса, биылғы қаңтардан олардың еңбекақысы тағы да 18 пайызға, келесі жылғы қаңтардан 17 пайызға көбейеді.
Бұдан бөлек, «Қазақстан Республикасының кейбір заңнамалық актілеріне ғылым және білім беру мәселелері бойынша өзгерістер мен толықтырулар енгізу туралы» заңда көзделген нормалар шеңберінде ғылыми атақтардың болуы үшін ғылыми қызметкерлерге қосымша ақы мөлшері ұлғайтылды. Бұл заңға Мемлекет басшысы биылғы 6 мамырда қол қойды.
Заңға енгізілген түзетулердің бірінші желісі педагогтер мен ғылыми қызметкерлердің материалдық жағдайын жақсартуға арналған. Атап айтқанда, белгілі бір ғылыми дәрежесі мен атағы бар педагогтер үшін ай сайын төленетін қосымша ақы мөлшері көбейді.
Мәселен, философия докторы (PhD), бейіні бойынша доктор дәрежесі үшін 17 АЕК; философия докторы дәрежесі (PhD) және қауымдастырылған профессор (доцент) ғылыми атағы, бейіні бойынша доктор дәрежесі және қауымдастырылған профессор (доцент) ғылыми атағы үшін 25 АЕК; ғылым кандидаты ғылыми дәрежесі үшін 17 АЕК, ғылым докторы ғылыми дәрежесі үшін 34 АЕК; ғылым кандидаты ғылыми дәрежесі және қауымдастырылған профессор (доцент) ғылыми атағы үшін 25 АЕК, ғылым докторы ғылыми дәрежесі және қауымдастырылған профессор (доцент) ғылыми атағы үшін 42 АЕК; философия докторы (PhD) дәрежесі және профессор ғылыми атағы, бейіні бойынша доктор дәрежесі және профессор ғылыми атағы үшін 50 АЕК; ғылым кандидаты ғылыми дәрежесі және профессор ғылыми атағы, ғылым докторы ғылыми дәрежесі және профессор ғылыми атағы үшін 50 АЕК мөлшерінде ай сайынғы қосымша ақы белгіленеді.
Ғылыми дәрежесі мен атағы үшін осындай ай сайынғы қосымша ақы негізгі жұмыс орнында ғылыми-зерттеу жүргізетін ғылыми қызметкерлерге де белгіленді.
Сондай-ақ 40 жасқа толмаған талантты жас ғалымдарға жоғары немесе жоғары оқу орнынан кейінгі білім беру ұйымының эндаумент-қорының инвестициялық кіріс қаражатынан стипендия алу құқығы берілді.
