Фото: Үкімет
Үкімет басшысына өнеркәсіп және құрылыс, оқу-ағарту, денсаулық сақтау, энергетика, көлік министрліктерінің басшылары мен бірқатар облыс әкімдері су тасқыны салдарын жою жұмыстарының барысы туралы баяндады.
Апатты деп танылған 8 650 үйдің иесіне қайталама нарықтан үй сатып алынуда немесе жаңасы салынып жатыр. Өнеркәсіп және құрылыс министрі Қанат Шарлапаевтың айтуынша, 2 569 жаңа үй салынып жатыр, олардың 619-ы толықтай дайын. 2 431 үйдің іргетасы тұрғызылып, 2 207 үйдің қабырғасы қаланған және 2 007 нысан шатыры жабылған.
Сонымен қатар жөнделуі тиіс 9 189 нысанның 8 939-ында (97%) жұмыстар аяқталған. Сатып алу жоспарланған 6 081 үй мен пәтердің бүгінде 4 918-і (81%) сатып алынған.
Десе де, Премьер-министр су тасқыны салдарын жою және азаматтардың мүлкін қалпына келтіру бойынша белсенді жұмыс жүргізілсе де, бекітілген кестелерден кешігу фактілері бар екеніне тоқталды.
«Мемлекет басшысының су тасқынынан зардап шеккендерді уақытылы тұрғын үймен қамтамасыз ету жөніндегі міндеті мерзімінде орындалуы тиіс. Республикалық штаб қажетті шешімдерді қабылдады, қаржы толық көлемде бөлінді. Барлық ресурстарды жұмылдырып, жұмысты жандандыру қажет», деді Олжас Бектенов.
Сондай-ақ Үкімет басшысына әлеуметтік нысандарды қалпына келтіру жұмыстары туралы баяндалды. Су тасқыны салдарынан еліміздің 6 өңірінде 11 мыңға жуық бала оқитын 40 білім беру ұйымы зардап шеккен. Бұл бағытта да қалпына келтіру жұмыстары белсенді түрде атқарылып жатқандығы атап өтілді.
Бұл ретте Ақтөбе облысында 8 нысанға күрделі және ағымдағы жөндеу жұмыстары жүргізіліп жатыр. Үкімет резервінен 6 жаңа білім беру мекемесінің құрылысына 6,2 млрд теңге бөлінген. Ал, Атырау облысындағы 6 нысанда жөндеу жұмыстары 50%-ға аяқталған. Сонымен қатар балабақша мен мектеп құрылысы басталғаны белгілі болды.
Батыс Қазақстан облысында 4 нысанның ағымдағы жөндеу жұмыстарын 1 қыркүйекке дейін аяқтау жоспарланып отыр. Солтүстік Қазақстан облысында су басқан 5 білім беру ұйымының үшеуі оқу жылын бастауға дайын. Ақмола және Қостанай облыстарындағы білім беру мекемелерінде жөндеу жұмыстары аяқталуға жақын. Аталған өңірлерде 6 нысан зақымданған, солардың біреуі бұзылып, орнына жаңа ғимарат салынады.
Сонымен қатар өңірлерде 8 медицина мекемесі зардап шеккен. Үш нысанның құрылысы «Ауылда денсаулық сақтауды жаңғырту» бағдарламасы аясында жүргізіліп жатыр. Тағы үш нысанда ағымдағы және күрделі жөндеуді қажет етеді, ал біреуінің орнына жаңа ғимарат салу жоспарланған.
Бүгінгі таңда республикалық магистральдардың 102 учаскесінде жұмыстар толығымен аяқталған. Газ тасымалдау инфрақұрылымы нысандары штаттық режимде жұмыс істейді.
Өнеркәсіп және құрылыс министрлігіне әкімдіктермен бірлесіп, барлық жұмыстар аяқталғанға дейін құрылыс нысандарында үйлестіру мен бақылау жұмыстарын күшейту тапсырылды.
