Серік Ахметовтің үй қамақтағы мерзімі тағы да ұзартылды

АСТАНА. 12 маусым. Қазақстанның бұрынғы премьер-министрі Серік Ахметовтің үй қамақтағы мерзімі 2015 жылдың 18 шілдесі күнгі сағат 23:00-ге дейін ұзарды. Бұл туралы Қарағанды облыстық сотының баспасөз қызметі хабарлады. Хабарламада бүгін Қарағанды қаласының Қазыбек би аудандық сотында Серік Нығметұлына қатысты қылмыстық іс материалдарымен танысу барысында үй қамақта ұстау мерзімін ұзарту туралы өтініш хат қаралғаны айтылған. Аталған соттың 2015 жылғы 12 маусымдағы қаулысымен өтініш хат қанағаттандырылды. Айта кетейік, бұрынғы шенеунікке ірі көлемде мемлекет қаражатын жымқырды және пара алды, қызметін асыра пайдаланды, сондай-ақ, заңсыз кәсіпкерлікпен айналысты деген күдік негізінде Қылмыстық кодекстің 4-бабы бойынша 6 қылмыстық айып тағылуда. Соған сәйкес, 2014 жылдың 19 қарашасынан 2015 жылдың 18 ақпанына дейін үй қамаққа алынды. Кейін үй қамақ мерзімі 2015 жылдың 18 сәуіріне, 18 мамырына және 18 маусымына дейін үш рет ұзартылды. Еламан Қоңыр. Дерек: Қарағанды қаласы Қазыбек би аудандық сотының баспасөз қызметі. Сурет: egemen.kz.