Шетелдерде оқып жатқан 400-ден аса әскери қызметші өз дауыстарын берді

Шет мемлекеттердің жоғары оқу орындарында білім алып жатқан қазақстандық әскери қызметшілер Қазақстан Рес­пуб­ликасы Президенті сайлауында дауыс беруге қатысты. Бұл үшін он елдің ірі қала­ларында бірыңғай сайлау учас­­келері ұйымдастырылған болатын. Мысалы, Тверь, Ря­зань, Смоленск, Ярославль, Крас­нодар, Воронеж, Кострома қала­ларындағы әскери жоғары оқу орындарының курсанттары мен тыңдаушылары үшін бірыңғай сайлау пункті Мәскеуде ашылды. Мұнда таң атысымен 159 әскери қызметші дауыс беріп үлгірді. «Қазақстан Президентінің сай­лауына қатысу – біздің конс­титуциялық құқығымыз және азаматтық борышымыз. Бұл шара – ел тағдыры. Мемлекет басшысын таңдау арқылы біз өз бола­шағымызға, тұтастай еліміз қадам басар жолға таңдау жасаймыз. Мен әрбір қазақстандықтың дауысы маңызды деп санаймын. Біздің әрқайсымыз сай­лауға осы жауапкершілікті түсіне отырып келдік. Туған елі­мізден жырақта  жүрсек те, оның тағдыры бізді бей-жай қал­дырмауы тиіс деп ойлаймын»,  дейді Ресей Федерациясы Қор­ғаныс министрлігі Әскери уни­верситеті 5-курсының курсанты Данияр Жанжүменов. Осылайша дауыс беру біздің әскери қызметшілеріміз жүрген басқа елдерде де өтті. Олардың әр­бірі сайлау учаскесіне жете алуы үшін күні бұрын бару және қайту ба­ғыттарына әуе және теміржол кө­ліктеріне билеттер алынған болатын. Қазақстан Республикасы Пре­зиденті сайлауына Ресейде (248 адам), Беларусьте (35 адам), Украи­нада (19 адам), Түркияда (73 адам), Оңтүстік Кореяда (4 адам), АҚШ-та (8 адам), Қытайда (30 адам), Ұлы­британияда (1 адам), Гер­ма­ния­да (1 адам) және Үндіс­танда (12 адам) әскери жоғары оқу орындарында оқуда жүрген бар­лығы 437 қазақстандық курсант пен офицер қатысып үлгерді. Ор­на­ласқан жерлеріне қарамастан, олар­дың әрқайсысы өз азаматтық борышын атқарып, өз таңдауын жасады.