Фото: Zakon.kz
Сотталушы өзін кооператив иесі екеніне сендіріп, үй алуға көмектесемін деп иландырған.
41 жастағы әйел, тіпті, кеңсені жалға алып, әлеуметтік желілерде жалған жарнамасын белсенді түрде таратқан. Алаяқ «Отбасы», «50-де 50», «Тез арада бөліп төлеу» және «Жинақ» деген бағдарламаларды ойлап тауып, сол арқылы тұрғын үй сатып алуға көмек көрсетуге уәде берген.
Осылайша, салымшылар алаяқтың арнайы ашық шотына ақша аударған, өз пайдасын көздеген ол активтерді кейбір инвесторлардың есебінен тарту арқылы Астана, Ақмола облысы, Ақтау және Атырау қалаларынан кезекте тұрған басқа тұрғындарға баспана сатып алып берген. Осылайша ол кезегі келмей қалған 16 салымшыға жалпы сомасы 525 миллион теңгеге жуық материалдық шығын келтірген.
Сот оны қылмыстық құқық бұзушылық жасағаны үшін кінәлі деп танып, мүлкі тәркіленіп, басшылық қызметтерді атқару құқығын шектеумен қатар 6 жылға бас бостандығынан айырды.
