![Олимпиадашыларға пәтер берілді](/media/2024/08/22/marapat.jpg)
«Аймақ кәсіпкерлері халықаралық жарыстарда туған өңірінің намысын қорғап жүрген дарынды спортшыларды қолдауға әрқашан дайын», деген облыс әкімі өңірдегі спортты дамытуға үлес қосқан «Elit Stroy Group» құрылыс компаниясының директорлар кеңесінің төрағасы Бекзат Сармонов пен «Каз Строй Монолит» компаниясының коммерциялық директоры Әлімжан Сәрсенбаевқа, «КаzSМU» компаниясына ерекше алғыс білдірді.
«Біз сіздерді мақтан тұтамыз, сіздердің медальдарыңыз – бұл жай ғана спорттық жүлделер емес, олар – батылдықтың, қайсарлықтың, Отанға деген шексіз сүйіспеншіліктің нағыз үлгісі. Бұқаралық спортты дамытып, чемпиондарымызды қолдау үшін алдағы байрақты бәсекелерде де спортшыларымыздың жарқын жеңістерге жетуіне біз барлық жағдайды жасаймыз», деді М.Елеусізұлы.
Облыс басшысы өңірдің барша кәсіпкерлері атынан Олимпиаданың күміс жүлдегері Демеу Жадыраевқа 10 миллион теңгенің сертификаты мен 3 бөлмелі пәтердің кілтін, сондай-ақ қола жүлдегер Назым Қызайбайға да бизнес қауымдастығының сыйлығы 3 бөлмелі пәтердің кілті мен 2 миллион теңгенің сертификатын табыстады.
Спортшылардың жаттықтырушылары да марапатсыз қалмады. Жұмақан Тұрғанбеков пен Боранбек Қоңыратов өңірлік кәсіпкерлерден 2 миллион теңгенің сертификаты мен 2 бөлмелі пәтердің кілтін алды. Сонымен қатар Париж Олимпиадасында өнер көрсеткен Эдуард Ещенко (стенд ату), Әсем Орынбай (стенд ату), Мария Дмитриенко (стенд ату) және Никита Чирюкин (ату) кәсіпкерлер атынан 2 миллион теңгенің сертификатын иеленді.
Алматы облысы