Ресейде жоғары белсенділік танытылды

Мәскеудегі Қазақстанның Ресейдегі елшілігінің резиденциясында орна­ласқан №215 сайлау учаскесінде Қазақстан Республикасы Президентінің кезектен тыс сайлауы өтті. Осында өз азаматтық және конституциялық құқығын орындау үшін Ресейдің бірқатар аймақтарынан азаматтарымыз келіп дауыстарын берді, деп хабарлады Қазақстанның Ресейдегі елшілігінің баспасөз қызметі. «Мәскеуден басқа, Ресейдің – Санкт-Петербург, Қазан, Омбы және Астрахань қалаларында орналасқан еліміздің кон­сулдық мекемелерінде де сайлау учас­келері ашылды. Сағат 13:00-ге дейінгі мәліметке сәйкес, Ресей аумағы бойынша негізгі тізімге тіркелген 3000-ға жуық Қазақстан азаматтарының 2 152-сі, шамамен 72%-ы дауыс беріп болды. Осы мәліметке сүйенер болсақ, аталмыш елдегі сайлау үдерісі белсенді өтуде», деді Қазақстанның Ресейдегі елшілігінің кеңесші-уәкілі, сайлау учас­ке­сінің төрағасы Виктор Темірбаев. Оның айтуы бойынша, келген азаматтар сабыр­лы және ұйымдасқан түрде дауыс берген. Ресей елордасында дауыс беріп үлгіргендер арасында – Қазақстан ел­шілігінің дипломаттары, ҚР Сауда өкілдігінің және Еуразия эконо­мика­лық одақ комиссиясының (ЕАЭОК) қызметкерлері, Мәскеудегі ҚР ұлт­тық компаниялар өкілдері, Мәскеу жоғары оқу орындарының, әскери меке­ме­ле­рінің студенттері мен курсанттары бар. ЕАЭОК-тың экономика және қаржы саясатына жауапты мүшесі (министр) Тимур Сүлейменов өзі дауыс беріп болған соң, сайлауға қатысу ол азаматтық борыш және оны дер кезінде орындап отыру қажет, деп атап айтты. «Мен бүгін Ата Заңмен бекітілген құқығымды орындау үшін Смоленскі­ден арнайы келдім», деді Смоленск Әскери академиясының курсанты Се­рік Жексенбеков. «Бүгін барлық еліміз үшін аса ма­ңызды күн және менің пікірім бойынша еліміздің әр азаматы қай жерде болса да сайлауға қатысуы тиіс», деді Әскери дерижерлар институтының курсанты – Әди Қабдырахманов. Мәскеудегі учаскеге Ұлы Отан со­ғысының ардагері Андрей Цыку­новтың келгеніне БАҚ өкілдері ерекше назар аударды. «Мен Шығыс Қазақстанның Шемо­наиха аумағында дүниеге келдім. Әкем соғыста қайтыс болды. Содан кейін мен соғыста қаза тапқан миллиондаған отандастарым үшін кек аламын деген оймен жаяу әскер тобы құрамында шайқастым. Қазақстан жалпыға ортақ – Ұлы Жеңіске елеулі үлес қосты. Оқтар­дың жартысы туған республикамда жасалғаны белгілі. Барлықтарын келе жатқан жарқын мереке Ұлы Жеңіс күнімен шын жүректен құттықтаймын! Мен бүгінгі күні Ресей астанасында сайлау құқығымды орындағаныма өте ризамын. Қазақстанның одан әрі дамуына, биік жетістіктерге жете беруіне шынайы тілектеспін», деді ардагер. Халықаралық байқаушылар Мәс­кеуде өтіп жатқан сайлау үдерісінің ұйымдастырылуына жоғары бағасын беруде. ТМД Парламентаралық ассам­блея­сы талдау басқар­ма­сының кеңесшісі Вадим Бекетов «ТМД-ға қатысушы мемле­кет­тер­дің Пар­ламентаралық ассамблея­сы атынан халықаралық байқау­шы­лар №215 сайлау учаскесін­де мониторинг жүр­гіздік, іс-шараға дайын­дықтың жоғары деңгейін атап өту қажет», деп мәлімдеді. Қазақстанның Ресей Федерациясындағы елшілігінің баспасөз қызметі.