Компания мың жарым адамды жұмыспен қамтып отыр. Оның 598-і Семейде еңбек етеді. Бұған қоса қалдықтарды қайта өңдеу кешенінде 150 жұмыс орнын құру жоспарланған. Мекеме басшылығының мәліметінше, «ЭЙКОС» ЖШС қызметкерлерінің орташа жалақысы осы жылдың бірінші тоқсанында 359 446 теңге болды. Компания сатылатын өнім көлемі бойынша елімізде көшбасшы орынға көтерілді. Өткен жылы кәсіпорын 1,5 млн-нан астам дөңгелек сатып, отандық нарықты қамту көрсеткішін шамамен 20%-ға жоғарылатты.
Қызметкерлерінің әлеуметтік жағдайын жақсартуға, бос уақыттарын тиімді өткізуге жағдай жасаған. Тауарларды түсіру-тиеу жұмыстарымен айналысатын қызметкерлерді тегін тамақпен қамтамасыз етеді. Сонымен қатар мұнда еңбеккерлердің спортпен шұғылдануына жағдай жасау да қарастырылған. Бұған қоса жұмысшылардың жан-жақты медициналық қызмет алуы үшін арнайы клиникамен де келісім жасалған.
Қазір еліміз бойынша ірі кәсіпорындар әлеуметтік аз қамтылған отбасыларға көмек қолын созып жүр. Әріптестері арасында биік беделге ие болған «Эйкос» компаниясы 2021 жылдан бастап қызметкерлерге, Екінші дүниежүзілік соғыс ардагерлеріне, жалғызбасты зейнеткерлер мен аналарға, аз қамтылған және көпбалалы отбасыларға материалдық көмек көрсетіп, шамамен 200 млн теңгеге қайырымдылық және демеушілік жасады.
Қазіргі уақытта компания өнім көлемі бойынша елімізде жетекші орынға ие. Сонымен қатар кәсіпорын үздік 50 ірі жеке салық төлеуші қатарына кіреді. 2023 жылы шамамен 1,5 млн шина сатылып, бюджетке 9,5 млрд теңгеден астам қаржы түскен.
Алдағы уақытта қолданыстағы кәсіпорын базасында дайын өнім шығаратын автокөліктерді, қолдану кезінде пайда болатын қалдықтарды қайта өңдеу кешенін салу жоспарланып отыр. Қалдықтарды қайтадан өңдеу барысында қауіпсіз жабындар, термопластика, сым және тағы басқа тұрмысқа пайдалы жабыдықтарды алуға мүмкіндік туады. Осы мақсат іске асқан жағдайда кәсіпорынның өнімділігі тәулігіне 50 тоннаға дейін өсуі ықтимал. Оның ішінде тәулігіне 10 тонна шинаны термиялық өңдеуге және 40 тоннасын механикалық өңдеуге жіберуді ойластырып жатыр.
«Термиялық өңдеу нәтижесінде дайын өнім басқа өндірістік үдерістер үшін шикізат бола алатын отын, техникалық көміртегі және жоғары легирленген болаттан тұрады. Механикалық жағдайда – автошиналар, жүгіру жолдары мен ойын алаңдарына арналған жабындар жасауға жарамды 4 фракциядан тұратын үгінділер шығарылады. Жобаның жалпы құны 2,5 млрд теңге деп көздеп отырмыз», дейді кәсіпорын мамандары.
Жақында ғана Семейге келген сапарында Үкімет басшысы Олжас Бектенов аталған кәсіпорын қызметкерлерімен кездесіп, ел бойынша 10 компания қалдықтарды жинау және қайта өңдеудің өзіндік жүйесін пайдаланатынын айтқан еді. Сонымен бірге олардың басым бөлігі шиналарды импорттайтын және қайта өңдейтін кәсіпорындар екенін де атап өткен. Үкімет басшысы бұл бастаманы қолдайтынын айтып, Экология және табиғи ресурстар министрлігіне мүдделі ұйымдармен бірлесіп, аталған мәселені жан-жақты қарастыруды тапсырған болатын.
Үкімет басшысының қолдауынан қуат алған «Эйкос» резеңке техникалық бұйымдар шығару және қайта өңдеу кәсіпорнының қызметкерлері өз жұмыстарын қарқынды атқарып жатыр.
Абай облысы
