Фото: gov.kz
Іс-шара аясында қатысушыларға Қазақстанның атом энергетикасы мен ғылым саласындағы жетістіктері, осы саладағы мүмкіндіктері таныстырылды. Көрме атом саласына мамандар дайындайтын елдегі жетекші университеттерінің ғылыми және кадрлық әлеуетін де көрсетті.
«ҚазАтомЭкспо – жай ғана көрме емес, бұл еліміздің дамуындағы маңызды қадам. Біз Қазақстанның бейбіт атомдарды одан әрі дамыту үшін пайдалана отырып, атом энергетикасында жетекші орынға шығуға дайын екенін бүкіл әлемге көрсетеміз. Бұл іс шара ынтымақтастық пен біздің салаға инвестиция салудың жаңа перспективаларын ашады», деді «Қазақстан атом электр станциялары» ЖШС бас директоры Тимур Жантикин.
Көрмеде Қазақстанда атом электр станциясын салу бойынша әлеуетті шетелдік экспоненттер ретінде – «Қытай ұлттық ядролық корпорациясы» (CNNC), «Кореяның су ресурстары және ядролық энергетика корпорациясы» (KHNP), «Électricité de France» (EDF), сондай-ақ ресейлік «Росатом» мемлекеттік корпорациясы қатысты. Бұл компаниялар өздерінің ядролық технологияларын, жетістіктерін, қазір атқарып жатқан жобалары мен жоспарларын жұртшылыққа таныстырды. Сонымен қатар ядролық салада жұмыс істейтін «Samsung» және «Assystem» халықаралық компанияларының стендтерін атап өткен жөн.
«Біз көрмеге қатысқанымызға қуаныштымыз. Бұл қазақстандық серіктестерге соңғы жетістіктерімізбен таныстырып, болашақ бірлескен жобаларды талқылаудың бірегей мүмкіндігі. Қазақстанның атом энергетикасы саласында орасан зор әлеуеті бар және біз оның дамуына үлес қосуға дайынбыз», деді Таяу және Орталық Азия, Таяу Шығыс өңірлері үшін жаңа энергетикалық құрылыс саласындағы халықаралық жобалар жөніндегі вице-президенті Гийом Пураве.
Көрме қатысушылары ядролық технология саласындағы соңғы әзірлемелерді, соның ішінде жаңа буын реакторлық қондырғыларды, қауіпсіздік және бақылау жүйелерін, радиоактивті қалдықтарды басқару технологияларын ұсынды. Атом саласы үшін жоғары білікті мамандарды даярлау мәселелеріне ерекше назар аударылды.
Қазақстан Республикасының Ұлттық ядролық орталығы атом өнеркәсібінің ең ірі және ең заманауи тәжірибелік базасы бар еліміздің флагманына айналды. Оның құрамына бірегей зерттеу ядролық реакторлары – ИВГ1.М және ИГР, сондай-ақ әлемде теңдесі жоқ қазақстандық термоядролық материалтану токамак КТМ кіреді. Сондай-ақ реактордан тыс әртүрлі эксперименттер жүргізуге арналған қондырғылар мен стендтер, мамандандырылған зертханалар және ядролық сынақтарды бақылаудың халықаралық жүйесінің бөлігі болып табылатын геофизикалық бақылау станцияларының желісі ұсынылған.
«Көрменің тақырыбы мен Ұлттық ядролық орталықтың құзыретін ескере отырып, көрмеде ядролық энергетикалық қауіпсіздік мәселелерін шешуге ерекше көңіл бөлінеді. Кәсіпорынның негізгі құзыреттерінің бірі – перспективті және қазіргі уақытта қолданылып жүрген атом энергетикалық реакторларының қауіпсіздігін жақсарту және халыққа және қоршаған ортаға теріс әсер ету қаупін азайту бойынша жұмыс. Орталық Жапонияның, Францияның және Ресейдің жетекші ұйымдарымен бірлесіп ірі ғылыми жобаларды жүзеге асыруда», деді Қазақстан Республикасы Ұлттық ядролық орталығының басшысы, физика-математика ғылымдарының докторы Эрлан Батырбеков.
Көрмеде жетекші әлемдік және қазақстандық сарапшылар мен ғалымдардың қатысуымен пленарлық отырыстар да болды. Қатысушылар Қазақстанның атом энергетикасын дамыту перспективаларын, оның ішінде жаңа атом электр станциясын салу және экономиканың әртүрлі салаларында атом энергиясын пайдалануды кеңейту мәселелерін талқылады. Сондай-ақ атом энергетикасының қауіпсіздігі мен сенімділігі мәселелері және осы саладағы халықаралық ынтымақтастық бағыттары талқыланды.
«ҚазАтомЭкспо – ғалымдар мен зерттеушілер үшін өз жетістіктерімен бөлісуге және бірлескен жобалар үшін жаңа серіктестер табуға тамаша мүмкіндік. Ядролық физика институты атом энергиясын бейбіт мақсатта пайдалану саласындағы Қазақстандағы жалғыз ғылыми-зерттеу ұйымы болып табылады. Бұл көрменің нәтижелері әлемдік атом ғылымының дамуына зор үлес қосатынына сенімдіміз», деді Энергетика министрлігі Ядролық физика институтының басшысы Саябек Сахиев.
KazAtomExpo жаһандық атом өнеркәсібіндегі жарқын оқиғаға айналды және Қазақстанның осы саладағы сенімді және перспективалы серіктес мәртебесін растады.
