Жарыстың аяқталуына небәрі екі тур қалғанда қазақтың дарынды қызы алға шықты. Бұл ретте ол Испанияның намысын қорғаған ирандық Сарасадат Хадемальшариех пен Швейцарияның туы астында өнер көрсетіп жүрген ресейлік Әлем және Еуропа чемпионы, Әлем кубогінің жеңімпазы Александра Костенюкты қапы қалдырды. Ал Лела Джавахишвили мен Нана Дзагнидзе (Грузия), Мария мен Анна Музычук (Украина), Алина Кашлинскаямен (Польша) ұпай бөлісті. Қалған екі ойынның ең болмағанда біреуін жеңіспен аяқтағанда бас жүлде Бибісараға бұйыратын еді. Алайда Ставрула Цолакиду (Грекия) және Рамешбабу Вайшалиге (Үндістан) қарсы кездесулер тең аяқталды. Сөйтіп, 9 мүмкіндіктен 5,5 ұпай жиған Асаубаева күміс медальды мойнына ілді. Бірінші орынды Алина Кашлинская олжаласа, Ставрула Цолакиду үшінші сатыға табан тіреді.
– Бүгін Тбилисиде әйелдер арасындағы Гран-при додасының бірінші кезеңі аяқталды. Бұл серия үш турнирден тұрады. Сол жарыстарда жер-жаһанның 20 үздік шахматшысы бір-бірімен шеберлік байқасып, «Үміткерлер турниріне» қатысуға жол ашатын екі жолдама үшін таласады. Грузияның астанасында мен 9 мүмкіндіктен 5,5 ұпай алдым. Бір қуантарлығы, бірде-бір бәсекеде ұтылған жоқпын. Нәтижесінде, екінші орынды еншіледім. Әрине, одан да жақсы нәтиже көрсетуге тырысқаным рас. Енді келесі жолы бас жүлдені олжалау үшін барымды саламын, – дейді Б.Асаубаева.
ФИДЕ-нің Гран-при турнирінің келесі кезеңі осы жылдың қазан айында Шымкентте өтеді. Сол жарыста да атақтары алысқа жайылған көптеген мықты гроссмейстер өнер көрсетеді.
