Өздігінен сүндеттеліп қалған сәби

Сырым ауданының орта­лығы – Жымпиты кентінде адам сен­бестей таңғажайып оқи­ға орын алды. Осы жердің тұр­ғыны Болат Темірғалиевтің екі жарым жастағы Аят деген немересі өздігінен сүндеттеліп қалыпты. Бұл жәйтті көзімен көр­ген «Егеменнің» жан­ашыры әрі тұрақты авторы Шынар Молданиязова былай деп хабарлады. – Таң қылаң бере Аят ауырсынып жылап оянады. Атасы: «Неге жыладың, бір жерің ауырып тұр ма?» – деп немересінің денесіне көз салса, насыбайының ұшы пышақпен тіліп жібергендей екіге айырылып тұр екен. Сол сәтте Болат аға Аяттың өзінен өзі бір құдіретті күштің әсерімен сүндеттеліп қалғанына көз жет­кізеді. Ол сол күні сәл ауырсынып қызуы көтерілгенімен, қазір шауып жүр. Болат ағаның айтуынша, кішкене күнінде өзін де, өмірден озған ұлы Ерболды да осылай «періштелер сүндеттеп» кеткен екен. «Мұндай оқиға біз үшін таңсық емес. Әулетімізде үшінші рет орын алып отырған жайт. Аталарымыздың рухы шөпшек, неменеміздің денесіне пышақ тимесін деген ниетпен осылай еткен шығар. Дәрігерге көрсететін ештеңесі жоқ», дейді ол. Осы жағдайдан кейін Болат аға Сырым аудандық мешітінің өкіл имамы Армат Кәрімовті шақыртып құдайы беріп, құран оқытты. «Бұл – тек Алланың қалауымен болған іс. Мұндай оқиға арқылы Жаратқан Иеміз адамның өресі жетпейтін тылсым күштің барын сездіртіп, адамдарға ой салғысы келген шығар», деді өкіл имам таң­ғажайып оқиға жөнінде. Темір Құсайын, «Егемен Қазақстан».