Соның нәтижесінде таулы аймақтың көз арбайтын көркем сұлулығын, ғажайып көріністерін сырт еткізу арқылы жан-жақты жарнамалап, ішкі-сыртқы туризмнің дамуына ықпал етуге мүмкіндік мол.
Сапар жетекшісі – өлкетанушы Сағатбек Медеубекұлы. Ол бұл іс-шараның басты мақсаты ауданда туризмді дамыту, өңірдің тарихи орындары мен көрнекі жерлерін насихаттау үшін заманауи талаптарға сай фотоға түсіру және түсірілген ең үздік фотоларды БАҚ, әлеуметтік желілер арқылы тарату екенін айрықша атады. Осы мақсатта «Жерұйық көрем десең, Кегенге кел» атты үш күндік фотосапар ұйымдастырылды. Маңызы зор іс-шараға Кеген ауданының әкімдігі қолдау көрсетті.
Өлкетану сапарына әр деңгейлі БАҚ өкілдері, республикалық «Фотоөнер» бірлестігінің жетекшісі, фотоөнертанушы Асылхан Әбдрайым, ардагер фотожурналист Нұрманбет Қизатұлы, фотосуретші, ғалым Досжан Балабекұлы, фотосуретші Ернұр Манапхан, фотосуретші, журналист Дәурен Мұхаметжанов, трэвэл-блогер Мәлік Күшмұханов, мобилограф Айым Бахыбек, фотосуретші Марғұлан Жанұзақ қатысты. Олар ауданның барлық ауылдық округтерін аралап, ондағы Ереуілтөбе, Жуантөбе, Құмтекей сынды тарихи жерлерді, Екіаша жайлауы, Орта Меркі, Қызыларасан, Таңбалытасты, Ағанас жазығын, Көлсай көлін, Көртоғай шатқалдарынан қайталанбас суреттер түсіріп, қоржындарын тоғайтты. Өлкенің сұлу табиғаты мен шежірелі тарихына қанықты.
«Нұрманбет ағалары бата берген,
Жігіттердің барлығы фотомерген.
Табиғаттың, тарихтың қажеттісін,
Ұрпаққа аманат деп «ата» келген», деп этнограф Сағатбек Медеубекұлы жырмен түйіндегендей, бүгінгі фото – ертеңгі ел шежіресіне айналары ақиқат. Кәсіпқой фотографтар мен өлкетанушылардың тың суреттері баспасөз беттері мен әлеуметтік желілерде жарияланып қана қоймай, өңірде туризмнің дамуына зор ықпал етеріне үмітті.
Алматы облысы
