- Нью-Йоркте әлемнің сегіз танымал теннисшісінің қатысуымен өткен UTS турнирі аяқталды. Жүлде қоры 1 млн долларды құраған коммерциялық жобаға Александр Бублик те қатысты. Еліміздің бірінші ракеткасы ширек финалда грекиялық Стефанос Циципасты (3:2) ұтып, жартылай финалда аустралиялық Алекс де Минордан (3:1) айласын асырды. Бірақ финалда ол франциялық Гаэль Монфиске (1:3) есе жіберді. Бас жүлдені олжалаған саңлақ 301 000 долларды алса, ақтық сында сүрінген Бублик 161 000 долларды иемденді.
- Ресейлік Умар Кремлев жетекшілік ететін Халықаралық бокс қауымдастығын (IBO) құрдымға кетіру мақсатымен құрылған World Boxing ұйымының қатары тағы бес мемлекетпен толықты. Олар – Тайпей, Пәкістан, Бутан, Фиджи және Эквадор. Сөйтіп, аталған федерацияның мүшелігіне енген елдер саны 42-ге жетті. Жуырда олардың қатарына Қазақстан да қосылуға тиіс. Себебі IBO-ның құрамында қалған командалар алдағы Олимпия ойындарынан шеттетіледі.
- Футзалдан УЕФА Чемпиондар лигасының негізгі кезеңінің жарыс кестесі жарияланды. Төртінші топтағы матч мына командалар арасында өтеді: 22 қазан: «Семей» – «Спортинг» (Португалия), «Қайрат» – «Халадаш» (Мажарстан). 23 қазан: «Халадаш» – «Спортинг», «Қайрат» – «Семей», 25 қазан: «Семей» – «Халадаш», «Қайрат» – «Спортинг».
- Біріккен Араб Әмірліктерінің (БАӘ) Әл-Айн қаласында бокстан жасөспірімдер арасындағы Азия біріншілігінің шымылдығы түрілді. Парсы шығанағында Қазақ елінің намысын Мадира Жұмахан (46 кг), Айым Таңқыбаева (48 кг), Сила Биболсынқызы (50 кг), Жәмила Болатбекқызы (52 кг), Шырын Манапова (54 кг), Айғаным Қадырхан (57 кг), София Ващенко (60 кг), Алина Құдайгенова (63 кг), Айсұлу Мұхит (66 кг), Кәмила Оспанова (70 кг), Зарина Толыбай (75 кг), Айдана Убайдоллақызы (80 кг) және Сабина Жақсылық (+80 кг) сынды бұрымдылар қорғайды.
- Талдықорғанда садақ атудан ересектер мен жастар арасындағы ел чемпионаты мәреге жетті. Оған республикамыздың барлық өңірінен келген 200-ге тарта мерген қатысты. Жалпы есепте Жетісу облысы жеңімпаз атанса, екінші орынды Шымкент қаласы иеленді. Ал Ақмола облысы үшінші сатыға табан тіреді.
- АҚШ-тың әйгілі Forbes журналы кейінгі бір жылда ең көп табыс тапқан ТОП-10 теннисшінің есімін атады. Бұл көшті Карлос Алькарас бастап тұр. Жоғарыда айтылған мерзім аралығында «Үлкен дулыға» санатындағы турнирлерде төрт мәрте топ жарған 21 жастағы испаниялық ойыншының есепшотына 42,3 млн доллар аударылды. Одан кейінгі орындарға Новак Джокович (37,2 млн), Коко Гауфф (27,1 млн), Ига Швентек (26,7 млн), Янник Синнер (26,6 млн), Рафаэль Надаль (23,3 млн), Даниил Медведев (20,3 млн), Наоми Осака (14,6 млн), Каспер Рууд (13,9 млн), Арина Соболенко (13,7 млн) жайғасты.
- Перу астанасы Лимада жеңіл атлетикадан жастар арасында әлем біріншілігінің жалауы желбіреді. Бұл жарыста Фаина Мейірманова, Алина Чистякова, Ирина Конищева, Богдан Гончаров, Кристина Ермола сынды жерлестеріміз бақ сынайды.
- Өзбекстанның Самарқанд қаласында ескек есуден өтіп жатқан олимпиадалық емес қашықтықтардағы әлем біріншілігінде Мария Бровкова К-1 жаттығуында 500 метрлік қашықтықты 02:09.731 минутта жүзіп өтіп, қола медаль иеленді. Отандасымыз тек Украина мен Чили спортшыларынан қалып қойды.
