«Қазақша ән саламыз» фестивалі өңірдегі барлық этномәдени бірлестіктің басын қосты. Жалпы саны 60-тан астам қатысушы өнер көрсетіп, қазақтың танымал әндерін орындады. Фестивальдың аты айтып тұрғандай, мұнда тек өзге ұлт өкілдері қазақ тілінде ән салды. Әуелі қатысушылар жеребе тартысып, «Асыл әуен», «Шалқыма», «Сырлы саз», «Дудар-ай» топтарына бөлінді. Ал мәдени іс-шараның өзі «Халық әндері», «Қазақ композиторларының әндері», «Заманауи әндер» деген үш кезеңнен тұрды.
«Қазақша ән саламыз» жобасы Павлодар облысы әкімінің тапсырмасы бойынша тұңғыш рет облыстық Ассамблеяда өткізіліп отыр. Жоба мақсаты – жастар арасында қазақ мәдениетіне деген құрмет сезімін тәрбиелеу, өзге этнос өкілдері арасында рухани бірлік пен ұлтаралық келісім идеяларын тарату, мемлекеттік тілдің дамуына ықпал ету. Осы арқылы қазақтың мәдени құндылықтары ұлықталады. Этномәдени бірлестіктердің өкілдері қазақша ән шырқап, рухани өнерімізбен танысады. Бұл жоба өңірде алғаш рет ұйымдастырылды. Алдағы Республика күнінде өзгеше форматта өткіземіз деп жоспарлап отырмыз», дейді «Қоғамдық келісім» мекемесінің басшысы Нүрия Көбенова.
Қатысушылар жеребе таңдап, өздеріне берілген әндерді орындады. Олардың қатарында «Ана», «Ұстазым», «Саржайлау», «Армандастар», «Бір бала» туындылары бар.
ПАВЛОДАР
