Сурет: ашық дереккөзден
Қазір инфекциялық жұқпалы науқастар белең алатын өліара шақ. Осыған орай Президент тапсырмасы қалай орындалып жатыр деген сауалмен облыстық денсаулық сақтау басқармасы бастығы Қаныш Бижановқа қайрылған едік. «Қазіргі міндет жұқпалы аурулардың алдын алу болса, бұған қарсы біршама шара жасалып жатыр. Президент айтқандай, мемлекеттік бюджет тарапынан қомақты қаражат бөлінеді. Соны тек тиімді игеріп, халықтың денсаулығын сақтау шараларын арттыруымыз керек. Биыл облыс бойынша инфекциялық науқастарды жатқызуға арналған 181 жаңа емдеу төсектік орны ашылды. Оның ішінде 113 орын балаларға, 68 орын ересектерге арналған. Бүгінгі таңда COVID-19 науқасына ұшыраған 4 пациент стационарлық ем алып жатыр, олардың ішінде 2 жүкті әйел, сондай-ақ ЖРВИ-мен (жіті респираторлық вирустық инфекция) 18 адам емделуде жатыр, олардың 7-і ересек адам, 11-і бала», деді ол.
Соңғы күндері облыс бойынша ЖРВИ науқасымен 689 адам тіркелген. Оның ішінде 18 жасқа дейінгі балалар – 427, ересектер – 234, жүкті әйелдер – 28. Бұған қарағанда, облыстағы инфекциялық науқастың таралуы жиілеп бара жатқан сияқты. Сондықтан халықты вакцинациялау жұмысына жеделдік керек. Тәуекел тобына жататын адамдарды тегін иммундау үшін тұмауға қарсы вакцинация егу жұмыстары жаппай қолға алынған. Бүгінге дейін Ресейде шығарылған «Гриппол плюс» вакцинасының 60000 дозасы сатып алыныпты. Вакцинация науқастың тіркелген жері бойынша емханаларда жүргізіледі. Сонымен бірге 11 жастағы қыз балаларға АПВ-ға (адам папиломасының вирусы) қарсы вакцинация жоспарланған. Солтүстік Қазақстан облысында вакцинациядан өтуге тиісті 3638 қыз бар. Бұл вакцинаның 7276 дозасын бірыңғай дистрибьютор «СК–Фармация» сатып алады. Оның мәліметі бойынша, вакцинаны Америкадан жеткізу жоспарланған.
Солтүстік Қазақстан облысының санитарлық-эпидемиологиялық бақылау департаментінің басшысы Әсет Жұматаев өңірдегі жұқпалы науқас жайын толықтырды. «Қазір мониторинг көрсеткеніндей, елде респираторлық вирустар, соның ішінде КВИ айналымы байқалады. Ағымдағы жылдың басынан бері коронавирустық инфекцияның 54 жағдайы тіркелді. Қайтыс болғандар жоқ. Бұл ретте ЖРВИ, вирустық пневмония және КВИ-мен емдеуге жатқызудың саны былтырғымен салыстырғанда өскен жоқ. Бұл КВИ ағымы көп жағдайда жеңіл түрде өтіп жатқандығын көрсетіп отыр. Алайда секвенирлеудің соңғы деректері бойынша, елімізде бүкіл әлемдегідей, Омикрон штамының әртүрлі нұсқасы таралып жатқандығы расталған», деді ол.
Биыл Бас мемлекеттік санитарлық дәрігердің міндетін атқарушы «2024-2025 жылдардың эпидемиялық маусымына арналған тұмау, жіті респираторлық вирустық инфекциялар (ЖРВИ) және коронавирус инфекциясы (COVID-19) бойынша санитарлық-профилактикалық, санитарлық-эпидемияға қарсы іс-шаралар өткізу туралы» 2024 жылы 16 тамызда қаулыға қол қойды. Бұл қаулы ЖРВИ, тұмау және COVID-19 бойынша эпидемиялық маусым кезеңінде профилактикалық және эпидемияға қарсы іс-шараларды өткізуді көздейді, оның ішінде:
– медициналық ұйымдарда: кіре берісінде «сүзгілердің» жұмысын қамтамасыз ету, бетперделерді пайдалану, антисептиктердің болуы;
– ЖРВИ, тұмау белгілерімен жүкті әйелдер мен бір жасқа дейінгі балаларды үйге шақыру келіп түскен жағдайда бірінші кезекте қызмет көрсету;
– 2024 жылғы 15 қыркүйектен бастап тұмауға қарсы вакцинация жүргізу.
Тегін негізде вакцинация тәуекел тобына жататын адамдарға: медицина қызметкерлері, медициналық ұйымда диспансерлік есепте тұрған балалар, сәбилер үйлерінің бөбектері, қарттар үйлерінің контингенті, эпидемиологиялық көрсеткіштер бойынша (2-3 триместрдегі жүкті әйелдер, созылмалы аурулары бар адамдар, 65 жастан асқан адамдар және т.б.) тіркелген жері бойынша емханада жүргізілетін болады.
Жалпы тегін негізде 60 мың адамды егу жоспарланған. Қазір облыстың денсаулық сақтау басқармасы мен санитарлық-эпидемиологиялық қызметтері инфекциялық ауруларға қарсы егу жұмыстарын жасауға дайын.
Солтүстік Қазақстан облысы
