Кеңес құрамына Парламент Мәжілісінің депутаттары – Марат Бәшімов, Николай Арсютин, Айдос Сарым, сондай-ақ Бейбіт Мамраев, Дихан Қамзабекұлы, Кәкімжан Бишманов, Айнұр Сабитова, Мэлс Семгалиев, Ербол Үстеміров, Серік Сәпиев, Ғани Нығметов, Михаил Коломин сынды қоғам қайраткерлері мен ғалымдар кірді.
Отырыста Қоғамдық кеңестің төрағасы болып ашық дауыс беру арқылы бірауыздан Марат Бәшімов қайта сайланды.
Сыбайлас жемқорлыққа қарсы қызмет басшысы Асхат Жұмағали өз сөзінде агенттік жұмысы тиімділігінің негізгі көрсеткіші азаматтардың сенім деңгейі екенін және бұған қоғаммен белсенді өзара іс-қимыл арқылы ғана қол жеткізуге болатынын атап өтті.
«Жемқорлыққа қарсы маңызды бастамалар қоғамдық кеңес мүшелерімен талқыланады. Кеңес заңнаманы жетілдіру бойынша ұсыныстар енгізуге, стратегиялық құжаттарды талқылауға қатысуға, агенттіктің жұмысына мониторинг пен бағалау жүргізуге, сондай-ақ оны одан әрі жақсарту үшін ұсынымдар әзірлеуге құқылы», деді А.Жұмағали.
Қоғамдық кеңестер жемқорлыққа қарсы саясатты іске асыру үдерісінде маңызды рөл атқарады. Олардың ықпалы мен өкілеттігі жыл сайын артып келеді. Кеңес мүшелері үкіметтік емес ұйымдардың, бұқаралық ақпарат құралдарының және ғылыми топтардың сарапшыларын тарта отырып, өзекті мәселелерді зерттеу үшін жұмыс топтарын құра алады.
Қоғамдық кеңестің жаңадан сайланған төрағасы Марат Бәшімов әріптестеріне сенім білдіргені үшін алғыс айтып, елдің жемқорлыққа қарсы саясатын жақсарту бағытында белсенді жұмысты жалғастыруға дайын екенін білдірді.
Отырысты қорытындылай келе, Асхат Жұмағали қатысушыларға алғыс білдіріп, жемқорлыққа қарсы іс-қимылды күшейтуге бағытталған жаңа бастамаларды әзірлеуде сәттілік тіледі.
