Сурет: kazislam.kz
80 үміткер қатысқан байқауда үміткерлер Құранды мәнерлеп оқу, 10 пара, 20 пара, 30 пара сынды төрт аталым бойынша өзара кім мықтыны анықтады. «Қазақ – ертеден Құран десе құлағы түрулі тұратын, Алланың сөзін құрмет тұтатын халық. Кімнің үйіне барсаңыз да төрінде Құран ілулі тұрады, ал оны біреу оқыса, ұйып тыңдайды. Елімізде жыл санап қариларымыздың қатары артып келеді. Осы байқауды өткізуге демеуші болған Бахаридин Нұғманұлына, Сәдуақас Олжабаев қариымыз бастаған әділқазы мүшелеріне алғысымды білдіремін», деді іс-шараға арнайы қатысқан бас мүфти Наурызбай қажы Тағанұлы.
Екі күнге созылған жарыс нәтижесінде жеңімпаздар мен жүлдегерлер анықталып, қомақты қаржылай, заттай сыйлықтарға ие болды. Атап айтқанда, қазылар алқасының шешімімен «Мәнерлеп оқу» сайысында атыраулық Саламат Иманғалиев, 10 пара бойынша астаналық Дінмұхамед Әбішев, 20 пара бойынша қарағандылық Арсен Есімбек, ал 30 пара, яғни Құранды толық оқу бойынша алматылық Әбілқайыр Жұбан жеңімпаз деп танылды.
Бас жүлдені жеңіп алғандар мен жүлдегерлердің бәріне 300 мың теңгеден 4 млн теңгеге дейін қаржылай сыйақы табыс етілді. Ал Құранды толық жаттаудан алдына жан салмаған Әбілқайыр Жұбан «Haval» маркалы автокөлікті тақымына басты.
Еске сала кетсек, республикалық байқауға қатысуға алдымен әр өңірде облыстық іріктеу жарыстары ұйымдастырылған болатын. Мұндай Құран жарыстарын елімізде жыл сайын өткізу жақсы дәстүрге айналған.
