Мемлекет басшысы Ұлттық құрылтайда сөйлеген сөзінде: «Шын мәнінде, озық ойлы ұлт болудың ең төте жолы – кітап оқу. Сондықтан кітап оқу мәдениетін қоғамда барынша орнықтыруымыз керек», деген болатын. Биыл екінші мәрте өтіп жатқан қазталовтық кітапқұмарлар сайысына қарап, Президенттің тапсырмасы шалғайдағы ауданда шын мәнінде жүзеге асып жатқанын көрдік.
Биыл байқау ережесінде өзгеріс бар екен. Оқушылардың жас ерекшелігі, оқу деңгейі ескеріліп, 5–7 және 8–11 сынып оқушыларына арналған кітаптар тізімі бекітілген. Жүлде қоры да молайып, 2 млн теңге болған. Байқау тест және әңгімелесу сынды екі кезеңнен тұрды. Оқушылар жаз бойы оқыған кітаптарын еске түсіріп, рухани сынға түсті.
«Мен оқыған 30 кітап» байқауы ауданымызда екінші мәрте өтіп жатыр. Бұл – білімге қанат қаққан оқушыны жігерлендіріп, зиялы ұлт қалыптастыруға септігін тигізетін дәстүрлі жоба. Руханиятымызды кемелдендіріп, ұрпағымыздың зейінін ашып, талабын шыңдауға, ауыл балаларының кітапқа құмарлығын арттыруға қолдау көрсеткені үшін ұстаздарға, кітапханашыларға, ата-аналарға ризашылығымды білдіремін», дейді аудан әкімінің орынбасары Серік Қайырлиев.
Байқау қорытындысына сәйкес қазылар шешімімен кітапқұмарлардың кіші тобында Қараөзен мектеп-лицейінің оқушысы Рамина Тілемісова бас жүлдеге ие болса, ІІ орынды қараөзендік Айша Рахимова жеңіп алды. ІІІ орынды қараөзендік Сәнім Тұрарбек пен қараобалық Әзиза Ережеп бөлісті.
Ал 8–11 сынып оқушылары арасындағы додада Тереңкөл мектеп-бөбекжайының оқушысы Нұрайым Рахметке ешкім тең келмеді. Қазталов мектеп-лицейінің оқушысы Бахтияр Тольяти – ІІ орын, Қараөзен мектеп-лицейінің оқушысы Аяулым Тілепберген мен Бостандық орта мектебінің оқушысы Айман Маркс ІІІ орынға табан тіреді.
Байқау жеңімпаздары қаржылай сыйлыққа ие болды. Атап айтсақ, І орын үшін – 300 мың, ІІ орын үшін – 200 мың, ІІІ орын үшін – 100 мың теңге бұйырды. Ал қалған қатысушылар 30 мың теңгелік ынталандыру сыйлығын қанағат тұтты.
«Мен оқыған 30 кітап» байқауы каникул кезінде оқушыға берілген тапсырма десе де болады. Бір байқағаным, қазталовтық оқушылар ересектердің ескертуінсіз-ақ кітап оқуға құштар екен. Оқушылардың, ұл-қыздарымыздың интеллектуалдық дәреже деңгейін көтеретін мұндай бастаманы облыс, тіпті Қазақстан бойынша насихаттау қажет», дейді Президент жанындағы Ұлттық құрылтай мүшесі, жазушы-журналист, «Орал өңірі» облыстық қоғамдық-саяси газетінің бас редакторы, Қазақстан Жазушылар одағының Батыс Қазақстан облысындағы өкілі Бауыржан Ғұбайдуллин.
Батыс Қазақстан облысы
