Солтүстік Қазақстанда 92 тапанша, 24 мылтық тәркіленді

ПЕТРОПАВЛ. 27 қаңтар. Үстіміздегі жылдың 1 қаңтарынан бастап газбен зақымдау қаруларын сатып алу республикалық акциясы басталғалы Солтүстік Қазақстан облысында қаруды өз еріктерімен тапсырушылардың қатары өсіп келеді. Бұл туралы облыстық ішкі істер департаментінің баспасөз қызметі хабарлады. Бүгінге дейін жеке тұлғалардан «ОСА», «Стражник», «Эгида» маркалы газбен зақымдайтын 92 тапанша пен 24 тегіс оқпанды және иір ойықты аңшы мылтығы алынған. «Қарудың техникалық жағдайына сәйкес үш санат бойынша берілетін өтемақы оның құнының 50-90 пайызын құрайды. Мәселен, ұңғымасыз «ОСА» қаруы үшін 20-30 мың теңге төленеді. Акцияны жүзеге асыруға республикалық қазынадан 22 миллион теңге бөлінді», дейді лицензиялық рұқсат беру жүйесі бөлімінің жетекшісі Еркін Хамзин. Үкімет қаулысына сәйкес газбен зақымдау қаруларын ерікті түрде тапсырудан бас тартқан азаматтар 2016 жылғы 1 қаңтардан бастап қылмыстық жауапкершілікке тартылатын болады. Өмір Есқали. Дерек: Солтүстік Қазақстан облыстық ішкі істер департаментінің баспасөз қызметі. Сурет: aikyn.kz.