Шетелдердегі қазақстандықтар да қалыс қалған жоқ

26 сәуірде Қазақстан Республикасының Венадағы елшілігінде кезектен тыс президенттік сайлау өткізу үшін №190 сайлау учаскесі ашылды. Сайлауға Австрияда тұрғылықты тұратын және консулдық есепке тіркелген, сондай-ақ, осында уақытша келген Қазақстан азаматтары қатысты. Елшілік ғимаратында азамат­тардың еркін дауыс беруіне бар­лық жағдай жасалды. ҚР ОСК нұсқаулығына сәйкес, кандидаттар туралы ақпараттық стендтер, жәшіктер мен дауыс беру кабиналары орнатылды. Елшілік қызметкерлерінің күшімен өз конституциялық құқығын Вена қаласына келіп орындай алмаған отандастарға тиісті стандарттар мен ережелер шеңберінде жылжымалы жәшік арқылы Грац қаласында дауыс беру ұйымдастырылды. Сайлауға Австрияда тұрғылықты және уақытша тұрып жатқан Қазақ­стан азаматтары, соның ішінде халықаралық ұйымдардың қызмет­керлері, қазақстандық дипломаттар мен олардың отбасы мүшелері, бизнес және студенттік қауымдастықтың өкілдері қатысты. * * * 26 сәуірде Қазақстан Респуб­ликасының Араб Мысыр Республи­касында ашылған №201 сайлау учаскесінде Қазақстан Республи­касының президенттік сайлауы өтті. Қазақстан азаматтары, әсіресе, студенттер мысырлық жоғары оқу орындарында өтіп жатқан емти­хандарға қарамастан, сайлау учас­келеріне келіп, азаматтық борыштарын орын­дауға асықты. Жексенбі жұмыс күні болғанымен, сайлауға Мысырда тұрақты немесе уақытша тұрып жатқан барлық азаматтарымыз қатысты. Сайлау үдерісі еш заң бұзушылықсыз қалыпты жағдайда өтті. Каир қаласына келе алмаған азаматтар үшін Александрия қаласына көшпелі комиссия ұйымдастырылды. Ал №201 сайлау учаскесінің жұмысы Каир уақытымен сағат 20:00-де аяқталды, сайлау нәтижелері Орталық сайлау комиссиясына жіберілді.   * * * Астанада таң ата бастағанда Варшавадағы Қазақстан елшілігінде Қазақстан Президентін сайлау аяқталды. Польшадағы қазақ­стан­дық азаматтар сайлауға белсенді қатысты. Елдің жоғары оқу орындарында білім алып жатқан қазақстандық жастардың отаншылдығын атап өткен жөн. Қазақстан елшілігі жанында құрылған сайлау учаскесіне тек Варшавадан ғана емес, Лодзь, Познань және Люблин секілді басқа қалалардан да студенттер келіп сайлауға қатысты. Қазақстанның Польшадағы елшісі Е.Өтембаев елшілікте қазақстандық жастармен кездесті. Польшада өткен әлем чемпионатында жеңіске жетіп, нәти­жесінде 2016 жылы Мәскеу мен Санкт-Петербургте өтетін жоғары дивизион ойындарына  қатысатын Қазақстан хоккей құрама командасының мүшелері де дауыс берді. Елші Е.Өтем­баев Қазақстан хоккейшілерін жеңістерімен құт­тықтады және сайлауға белсенді қатысқандарын атап өтіп, спорт­шыларға халықаралық алаңдарда мол табыс тіледі. * * * 26 сәуірде жергілікті сағат 07:00-ден бастап Қазақстан Республикасы Президентінің кезектен тыс сайлауына орай Оңтүстік Америка аймағында тарихта алғаш рет Қазақстан Респуб­ликасының Бразилия Федеративтік Республикасындағы елшілігінің ғимаратында орналасқан №247 сайлау учаскесі жұмыс істеді. Бразилияда және басқа да Латын Америкасы мемлекеттерінде тұратын Қазақстан азаматтары Федералдық аймақ, Бразилиа қаласына кезектен тыс сайлауға қатысып, дауыс беруге шақырылды, деп хабарлады Қазақстан Республикасы Сыртқы істер министрлігінің баспасөз қызметі.