Ел егемендігін алғашқылардың қатарында мойындап, өзара ынтымақтастық орнатуға ниет танытқан мемлекеттің бірі – Малайзия. Екі ел арасындағы дипломатиялық қарым-қатынастың негізі 1992 жылдың 16 наурызында қаланған. Сол себепті де, Батыс пен Шығыста саяси-экономикалық және әлеуметтік-мәдени қарым-қатынасты тең ұстап келе жатқан еліміз үшін Малайзия Шығыс Азиядағы сенімді серіктестердің бірі. Мемлекет басшысы Қасым-Жомарт Тоқаев: «Қазақстан мен Малайзия арасында ежелден келе жатқан достық байланыс бар. Біз көптеген маңызды салалардағы өзара іс-қимылымыз бен ынтымақтастығымызды ілгерілету үшін қосымша күш салуға дайынбыз», деген еді. «Education Malaysia Global Services» (EMGS) компаниясының соңғы статистикасына сүйенсек, биыл Малайзияға оқуға түскен студенттер саны бойынша еліміз алғашқы 10 мемлекеттің қатарына енген.
– Қазақстанда малайзиялық капиталдың қатысуымен 48 компания жұмыс істейді. Жалпы сомасы 410 миллион доллардан асатын 17 бірлескен инвестициялық жоба жүзеге асып жатыр. Малайзия жоғары сапалы білімімен, көпмәдениетті ортасымен, қолжетімді оқу және өмір сүру шығындарының арзандығымен халықаралық студенттер үшін тиімді мемлекет ретінде танымал. Биыл біздің жоғары оқу орындарымызға Астана, Алматы, Шымкент, Қарағанды, Атырау, Петропавл, Тараз, Ақтөбе қалаларынан мыңдаған студент түсті. Олар бизнес және әкімшілік, өнер, инженерия, педагогика, журналистика сынды мамандықтарды таңдаған. Бұған дейін екі мыңға жуық Қазақстан студенті Малайзияда жоғары білім алды, – деді Малайзияның Қазақстандағы елшісі Мохда Адли Бин Абдулла.
Білім көрмесінде Малайзияның алты жетекші университеті таныстырылды. Атап айтсақ, «Malaya» университеті (UM) – «QS World University Rankings» рейтингінде 60-орында тұр. Бұл оқу ордасы жоғары білікті оқытушыларымен және ғылыми зерттеулер саласындағы жетістіктерімен танымал. Ал «Universiti Putra Malaysia» (UPM) – «QS World University Rankings» рейтингінде 148-орында, сондай-ақ «5-Star Plus» мәртебесіне ие. Аталған жоғары оқу орны ауыл шаруашылығы, инженерия және менеджмент саласындағы бағдарламаларымен, сонымен қатар ғылыми белсенділігі һәм халықаралық серіктестіктерімен ерекшеленеді. Сол секілді «Asia Pacific University» – IT және мультимедиа саласына бағытталған танымал білім ордасы. Одан бөлек, «SEGi University» бизнес, цифрлық білім, өнер секілді көпсалалы бағдарламаларды ұсынса, «INTEC Education College» шетелдік университеттерге дайындық бағдарламаларын таныстырды. Ал «QS World University Rankings» рейтингінде 265-орында тұрған «UCSI University» бизнес, медицина және инженерия саласына маманданған оқу ордасы.
– Білім саласындағы екіжақты ынтымақтастықты дамыту үшін Малайзияның Жоғары білім министрлігі қос диплом бағдарламасын ұсынады. Яғни студенттер біздің университеттерде оқып жүріп-ақ Ұлыбритания, Аустралия немесе АҚШ-тың оқу ордаларында да білімдерін шыңдайды. Бұл білім алушыларға халықаралық деңгейдегі диплом алуға және олардың мансаптық мүмкіндігін кеңейтуге үлкен мүмкіндік береді, – дейді «EMGS» компаниясының маркетинг жөніндегі директоры Льюис Танг.
– Малайзия шет мемлекеттен келген студенттерге жоғары сапалы білім беріп, барынша қолайлы жағдай жасап отыр. Біз бұл бағыттағы жұмыстарды жалғастырып, екі ел арасындағы ынтымақтастықты нығайтамыз деген сенімдеміз. Жастардың бұл елді таңдауына негізінен өмір сүру сапасы әсер етеді. Нақтырақ айтсақ, жатын орын, азық-түлік, көлік байланысы студенттер үшін қаржылай тиімді, оқу ақысы да қымбат емес. Бас шаһарымыз Куала-Лумпурдан Алматыға тікелей рейстер «AirAsia» арқылы аптасына төрт рет орындалады, бұл білім алушылардың отбасымен байланыста болуына өте ыңғайлы. Сондай-ақ Куала-Лумпур қаласы «QS Best Student» нұсқасы бойынша Оңтүстік-Шығыс Азиядағы ең қолжетімді шаһар деп танылды. 2023 жылғы жаһандық бейбітшілік индексіне сәйкес, Малайзия әлемдегі қауіпсіз мемлекеттердің арасында 19-шы орында тұр. Яғни ата-аналардың алаңдауына еш себеп жоқ. Одан бөлек, Малайзия өзінің қонақжай және алуан түрлі қауымдастығымен танымал, – деді Мохда Адли бин Абдулла.
Білім көрмесін ұйымдастырушылар – «Education Malaysia Global Services» (EMGS) және «Malaysia International Education Centre» (MIEC) компаниялары. «EMGS» Малайзияның Жоғары білім министрлігінің басқаруымен құрылған ұйым. Аталған компания елді халықаралық білім беру орталығы ретінде дамытумен айналысады және шетелдік студенттердің виза алу үдерісін жүзеге асырады. Ал «MIEC» компаниясы жетекші университеттерге студенттерді тартып, ақпараттық қолдау көрсетуге маманданған.
– Малайзиядағы жоғары оқу орындарына бір ай бұрын қызығып, зерттей бастадым. Оған дейін Еуропа мемлекеттеріндегі университеттерді қарастырғам. Бірақ салыстыра келе, «Universiti Putra Malaysia» атты оқу ордасына тоқталдым. Өйткені бұл білім ошағы халықаралық бизнес саласына маманданған. Менің де іздегенім сол еді. Бұдан бөлек, ол жақтың өмір салты қолайлы. Мұсылман халқы болғандықтан бәрібір бізге жақын. Оқу бағасы да салыстырмалы түрде өте арзан. Ең бастысы, Малайзияда оқитын студенттер сол елдің дипломымен қоса Ұлыбритания немесе Аустралия, Жаңа Зеландия, Франция, Швейцарияның дипломын да алып шығады. Осылайша, қос диплом жүйесі арқылы бір оқпен екі қоян атуға болады, – дейді Иманжүсіп Құтпанұлы атындағы орта мектептің биылғы түлегі Оңдасын Нұрислам.
