Жоғары баға

Кезектен тыс Қазақстан Республикасының Президентін сайлау барысын бір ай бойы толықтай қадағалаған ТМД байқаушылар миссиясы Орталық сайлау комиссиясында баспасөз мәслихатын өткізді. Жиынға ТМД елдерінен келген бірқатар байқаушылар қатысты. Сайлау кезеңін бақылау бойынша миссия өкілдері өз жұмыстарын ағымдағы жыл­дың наурыз айының отызынан бастаған болатын. Бір ай көлемінде сайлауалды және сайлаудан кейінгі жағдайларды мұқият барлай отырып, біз бірқатар мәліметтерді хабарлаймыз, деді ТМД байқаушылар миссиясының басшысы Сергей Лебедев. Және де ол ТМД миссиясы құрамында сегіз мемлекеттен барлығы 410 байқаушы бар екендігін атап өтті. Аталған мерзім ішінде егжей-тегжейлі бақылау жа­саған миссия өкілдері Қа­зақ­стандағы сайлауды ұйым­дастыру жүйесіне оң баға беріп отырғандығын жеткізді. Және де сайлаушылардың жоға­ры деңгейде белсенділік таныт­қандығын ерекше ықы­ласпен атап өтті. С.Лебедев бұл орайда «халықтың ағылып, кезекке тұрып дауыс беруі олардың мақсат-мүдделері ортақ екен­діктерінің, болашақтарына жауапкершілікпен қараған қадамының көрінісі» деді. Сонымен қатар, миссия басшысы Қазақстан мемлекетінің заңнамалық жағдайлары да жетіліп келе жатқандығын, ха­лық­­аралық сайлау құқы­ғының нормаларына сай, тіпті көптеген елдерге үлгі бо­лар­лық дәрежеде екендігін атап көрсетті. Және сайлау то­лықтай «Сайлау туралы» Қа­зақстан Республикасының Конс­титуциялық заңына сәйкес өтті. Дауыс беру еркін, ашық және демократиялық таңдау қағи­даттарына негізделді, деді. Сондай-ақ, миссия өкіл­дері сайлауалды және сайлау кезіндегі облыстардың дайын­дығына байланысты мониторинг жүргіз­гендерін айтты. 3534 сайлау учаскелерін аралап, олардың әрқайсысына жеке-дара үздік баға беруге болатындығын жеткізді. Эльмира МӘТІБАЕВА, «Егемен Қазақстан».