Бұл ақпаратты хабарлаған облыстық жедел медициналық жәрдем стансасының директоры Серік Орынбасаров өңірде медициналық жәрдем шақыртулар 5,5%-ға өсіп, олардың саны 229 097 болғанын айтады.
Әдетте, стансаға соғылатын қоңыраулар 4 санатқа бөлінеді. Есінен тану, жүрек ритмінің бұзылуы, тыныс алу қиындауы, құрысу, ауыр жарақаттар, қан кету және т.б. жағдайлар шұғыл көмекті талап етеді. Оларға «103» бригадалары жедел аттанып, норматив бойынша 10 минуттан 30 минутқа дейін жетіп, көмек көрсетеді.
Орал қаласында жедел жәрдем қызметіндегі әрбір бригада бір тәулік ішінде орта есеппен 16-17 шақырту алып, жолға шығады екен. Ал ауылдық жерде тәулігіне 8-9 шақырту түсетін көрінеді.
– Бізге хабарласатын науқастардың 26,3%-ы – тыныс алу органдарының ақауы бар науқастар болса, қан айналымы жүйесі сырқатына шалдыққандар барлық шақыртудың 22,6%-ын құрайды. Сондай-ақ неврологиялық аурулар – 10,4%, жарақаттар мен жазатайым оқиғалар – 7,4%, жұқпалы дерттер – 5,7%, асқазан-ішек аурулары – 4,6%, хирургиялық сырқаттар – 3,6%, акушерлік-гинекологиялық аурулар – 3,0%, зәр шығару жолдарының ауруы – 2,6% болып тұр, – дейді С.Орынбасаров.
Өңірде жер-жерлердегідей, қатты алаңдатып отырған бір мәселе – жол-көлік оқиғаларының өсуі. Полиция департаментінің мәліметіне қарағанда, 8 ай ішінде 698 жол апаты тіркелген. Осының салдарынан 64 адам қаза болып, 981 адам түрлі дәрежедегі жарақат алған.
«Көп жағдайда көлік жүргізушілері тарапынан жол ережесі тәртібі сақтала бермейді. Жүргізушілер арнайы көлікке жол бермейтін жағдай жиілеп кетті», дейді жедел жәрдем стансасының басшысы.
Осыған орай биыл тамыз айында өңірлік денсаулық сақтау басқармасы «Жедел жәрдемге жол бер» атты арнайы акция өткізуге мәжбүр болған. Акцияға «103» бригадасымен бірге жол-патрульдік полициясы, БАҚ өкілдері қатысты. Рейд барысында дыбыстық және жарық сигналдары қосылған жедел медициналық жәрдем көлігіне жол бермейтін көлік жүргізушілері анықталып, жазаға тартылды.
Несін жасырайық, соңғы кезде медицина саласына сын айтушылар да аз емес. Соның бірі – мамандардың біліктілігі мәселесі. Батыс Қазақстан облысында біраз жылдан бері медицина кадрлары жетіспейді. Кадр тапшылығын жою үшін жергілікті билік кешенді шараларды қолға алған. Олар – дәрігер мамандарын даярлау үшін облыс әкімінің гранттарын тағайындау, медицина мамандарына арналған әлеуметтік жеңілдіктер. Сонымен бірге өңірдегі бар медицина персоналының біліктілігін арттыру да үнемі жүргізіліп келеді.
Мысалы, жедел медициналық көмек көрсету сапасын арттыру мақсатында станса қызметкерлері арасында ауруханаға дейінгі кезеңде (BLS, ACLS PALS, PHTLS) медициналық көмек көрсетудің халықаралық стандарттары бойынша 2 жыл сайын оқу-тәжірибе жұмысы ұйымдастырылып тұрады. Сонымен қатар жедел жәрдем стансасында симуляциялық кабинет жұмыс істейді. Онда медицина қызметкерлері шұғыл көмек көрсету дағдыларын пысықтайды. Кабинет ересектер мен балаларды реанимациялауға, трахея интубациясына, коникотомияға, көктамыр ішіне және бұлшық ет ішіне енгізуге арналған муляждармен жабдықталған. Биыл тамыз айында симуляциялық кабинет үшін нақты жағдайларға барынша жақын оқытуға, медициналық персонал үшін ситуациялық міндеттерді модельдеуге мүмкіндік беретін мониторы бар көпфункционалды толық өлшемді тренажер сатып алынған.
Ауылдық жерлердегі жедел жәрдем бригадаларының кәсіби даярлығын арттыру мақсатында 4 симуляциялық кабинет ашу жоспарланып отыр. Сондай-ақ биыл орталық станса базасында оқу-симуляциялық орталығы да ашылмақ. Бұл орталық жедел жәрдем қызметкерлерінің жаттығу алаңы болмақ.
Батыс Қазақстан облысы
