Рио Олимпиадасының, әлем чемпионы, Азия ойындарының екі дүркін жеңімпазы, әлем чемпионатының күміс жүлдегері, құрлықтың екі дүркін чемпионы Данияр Елеусіновтің қарсыласы да осал емес еді. 28 жастағы Джо Нойнайдың кәсіпқойлар арасында күш сынасып жүргеніне 11 жылдан асты. Сол кезден бері рингке 29 мәрте көтеріліп, 23 рет жеңіске жетті. 11 кездесуді мерзімінен бұрын аяқтады. Төрт рет ұтылып, екі мәрте тең түсті. Бірақ қазақтың қайсар ұлына Джо лайықты қарсылық көрсете алмады. 10 раундқа есептелген жекпе-жек бел ортадан асқан тұста аяқталды. Бірінші, төртінші раундтарда нокдаун алған Нойнай бесінші раундтан кейін бәсекені жалғастырудан бас тартты. Сөйтіп Данияр WBC Peace нұсқасының чемпиондық белбеуін иеленді.
Әрине, жерлесіміздің бұл жеңісіне қуандық. Десек те ерекше бір шаттанып, кеудеміздің мақтаныш сезімі кернеді деп айта алмаймыз. Өйткені Даниярдың әлеуеті бұдан да зор еді. Осыдан бірер жыл бұрын әуесқой бокстағы барлық белесті бағындырған отандасымыздың кәсіпқой рингтің де ұшар шыңына шығатынына күмәнданғандар кемде-кем еді. Біз оны АҚШ-та, Нью-Йорктегі әйгілі «Мэдисон-сквер-гарденнен» көргіміз келді. Бірақ бәрі ойлағандай болмады. Ол жерде Елеусінов бір ғана жекпе-жек өткізді. 2019 жылғы 13 қыркүйекте жергілікті боксшы Решард Хиксты бірінші раундта ұрып жықты. Кейіннен тағы екі кездесуін Американың Финикс пен Холливуд қалаларында өткізді. Соңғы рет 2021 жылғы 19 желтоқсанда Астанада аргентиналық Хуан Эрнан Леалды ұпай санымен ұтып, IBO нұсқасында чемпиондық тәжді иеленді. Содан кейін Данияр екі жылға жуық уақыт бойы көпшілік назарынан тыс қалды.
Қазір Даниярдың жасы 33-те. Қартайып тұрған жоқ. Дәл осы жасында шаршы алаңда жасындай жарқылдап жүрген жуан жұдырықты жігіттердің қатары қалың. Қандасымыз мықты бір промоутер, менеджер тауып, сонымен жақсылап жұмыс істеуі керек. Бізге керегі – Елеусіновтің Астана немесе Алматыда емес, алыстағы Америкада айқасқаны. Биік белестерді бағындыруды мақсат тұтқан азаматтың шоқтығы биік боксшылардың шоғырланған жерінде, солардың қақ ортасында жүргені әлдеқайда тиімді. Тек сонда ғана Данияр кәсіпқойлар арасында Василий Жиров, Геннадий Головкин немесе Жәнібек Әлімханұлы секілді өзін түбегейлі мойындатады. Осы күнге дейін Елеусінов 12 жекпе-жек өткізіп, барлығында жеңіске жетті. Жеті жекпе-жекте қарсыластарын нокаутқа жіберді.
Алматыдағы бокс кешінде бір топ аралас жекпе-жек шеберлері кәсіпқой рингте өнер көрсетті. «Найман» деген жанама есіммен танылған атышулы Қуат Хамитов Нұрберген Шәріповті ұпай санымен ұтты.
Кәсіпқой рингтегі тұсаукесер кездесуінде Жұман Жұмабеков тәжік Асрор Акпарходжаевтан айласын асырды. Дастан Бекен мен Ерасыл Ақыранбек те жеңіске жетті. Алғашқысы ММА-да «Мотиватор» деген бүркеншік есімді иеленген Әнуарбек Бекембетовтен басым түссе, екіншісі ресейлік Михаил Долгополовтың осал тұсын тапты. Ал Әділжан Сандыбеков Ресейде туып-өскен қандасымыз Елнар Ишимбаевқа есе жіберді.
